ЦХИНВАЛ, 31 мар – Sputnik, Дзæгъиаты Олег. Хуссар Ирыстоны культурæйы бонтæ Мæскуыйы райдайдзысты паддзахадон ансамбль "Симд"-ы ралæудæй Чайковскийы номыл концертон залы. Уый тыххæй фехъусын кодта РХИ культурæйы министр Мамиты Григорий мыхуыр æмæ информацийы комитеты пресс-конференцийы рæстæджы.
Цхинвал æмæ Мæскуыйы 2026 азы ацæудзысты Хуссар Ирыстон æмæ Уæрæсейы культурæйы бонтæ.
"Культурæйы бонтæ бакæндзысты 21 апрелы. 22 æмæ 23 апрелы та Хетæгкаты Къостайы номыл паддзахадон драмон театр бавдисдзæн спектакльтæ "Иванов" æмæ "Сау нымæт" - фехъусын кодта Мамиты Григорий.
Мæскуымæ æдæппæт ацæудзысты Хуссар Ирыстоны культурæйы 120 минæвары бæрц.
"Хуссар Ирыстоны къухдариуæгад нын финансон æххуыс куы нæ бакодтаиккой, уæд нæ бон нæ уыдаид ахæм балц сорганизаци кæнын. Ныфс мæ ис, иууылдæр уый кæй æмбарынц", - радзырдта министр.
Уæрæсейы культурæйы бонтæ та Хуссар Ирыстоны ацæудзысты июны.