ЦХИНВАЛ, 16 апр – Sputnik. Хуссар Ирыстоны министрты кабинет сфидар кодта æххæстгæнæн системæйы закъоны проект ног редакцийы. Документы лыстæгдзинæдтæ хицауады рабадтыл цыппæрæмы раргом кодта юстицийы министр Джиоты Алан.
Йæ ныхæстæм гæсгæ, закъон хъæуы райсын, уымæн æмæ æрцыд ивындзинæдтæ тæрхондоны скъуыддзæгтæ æххæст кæныны системæйы: ист цæуынц ног информацион системæтæ, ивыд цæуынц банкон фиддонтæ æмæ тæрхондоны скъуыддзæгты реализацийы формæтæ.
Джиоты Алан
© Sputnik / Михаил Авагимов
"Закъон у Уæрæсейы Федерацийы цы æххæстгæнæн системæ архайы, уый æнгæс. Документ здæхт у æххæстгæнæн системæйы унификацимæ. Уый руаджы фенцондæр уыдзæн æмархайд нæ коллегæтимæ æмæ фидæны хуыздæр æххæст цæудзысты тæрхондоны скъуыддзæгтæ", - загъта Джиоты Алан.
Министр ма бахахх кодта, зæгъгæ, январы фæндагон змæлды фæткхæлды фæдыл ног закъон кæй райстæуыд, уый фæдыл хъуыд бахæссын ивындзинæдтæ. Закъоны проекты сфидар кодтой, Мидхъуыддæгты министрад æмæ тæрхондоны пъырыстъыфты службæйы æхсæн документтæ кæй зилдзысты электрон хуызы.
Джиоты Алан бафтыдта, зæгъгæ, закъон райсынæн нæ хъæуы уæлæмхас финансон фæрæзтæ республикæйы бюджетæй, æххæстгæнæн куыст та схиздзæн бæрзонддæр æмвæзадмæ.