ЦХИНВАЛ, 23 апр – Sputnik. Уæрæсейы Æнæниздзинад хъахъхъæнынады министрады специалисттæ системон аудит сарæзтой Хуссар Ирыстоны медицинон организациты куыстæн, фехъусын кодтой РХИ Æнæниздзинад хъахъхъæнынады министрады пресс-службæйы.
Басгæрст ацыд националон æнæниздзинад хъахъхъæнынады системæйы модернизацийы проекты фæлгæттты.
"Уæрæсейаг эксперттæ анализ скодтой республикæйы æнæниздзинад хъахъхъæнынады сæйраг объекттæн, сæ нымæцы Республикон клиникон рынчындон, амбулаторон-поликлиникон центр æмæ стоматологон поликлиникæ, наркологи æмæ психиатрийы Центр, Паддзахадон унитарон куыстуат "Югосмедпрепараты", - дзырдæуы хъусинаджы.
Республикон бирæпрофилон медицинон центры директор Дыгъуызты Ирина банысан кодта, уæрæсейаг коллегæты куыст тынг ахсджиаг кæй у медицинон æххуыс бакæныны нырыккон стандарттæ æрфидар кæнынæн.