ЦХИНВАЛ, 27 апр - Sputnik. Хуссар Ирыстоны юстицийы министр Джиоты Алан банхъардта саразын ноджы иу æппæтреспубликон зиу, цæмæй ныр та уæлдай хъусдард здæхт уа кувæндæттæ æмæ суадæттæм. Хъæппæрис фехъусын кодтой хицауады уæрæх рабадтыл.
Республикæйы æрæджы цы зиу ацыд, уый рæстæджы бафснайдтой уынгтæ, кæртытæ æмæ æхсæнадон тыгъдадтæ. Акцийы руаджы зынгæ фæхуыздæр горæты санитарон уавæр.
"Ахæм акци гæнæн ис ауадзын Республикæйы боны хæдразмæ. Æмæ æнæуи дæр зиутæ хорз уаид уадзын иудадзыг", - банысан кодта Джиоты Алан.
Премьер-министр Тадтаты Дзамболат бузныг загъта акцийы хайад чи райста, æппæт уыцы адæмæн. Афтæ ма уый хорзыл банымадта юстицийы министры хъæппæрис.