ЦХИНВАЛ, 28 апр - Sputnik. Хуссар Иры сараздзысты РХИ Фыдыбӕстӕйон хӕст ӕмӕ сӕрмагонд ӕфсӕддон операцийы (СӔО) ветеранты ассоциаци.
Ацы фарстыл республикӕйы президент Гаглойты Алан ӕрныхас кодта Цӕгат Ирыстоны СӔО-йы ветеранты Ассоциацийы ӕххӕстгӕнӕг директор Туаты Артуримӕ фембӕлды рӕстӕджы.
Ног организаци ӕрбаиу кӕндзӕн хӕстон архӕйдтыты хайадисджыты ӕмӕ здӕхт уыдзӕн сӕ интерестӕ хъахъхъӕнынмӕ, афтӕ ма ветеранты ӕхсӕнад сфидар кӕнынмӕ, фехъусын кодтой паддзахады сӕргълӕууӕджы пресс-службӕйы.
Ассоциацийы сӕргъ слӕудзӕн СӔО-йы хайадисӕг, 4-ӕм ӕфсӕддон базӕйы фыццаг штурмон батальоны командӕгӕнӕг, Хуссар Ирыстонӕй рацӕугӕ Котолиты Сослан. Организацийы къухдариуӕгады уыдзысты Хуссар Ирыстоны Фыдыбӕстӕйон хӕсты ветерантӕ дӕр.