Хæстон кады музей бакодтой Цхинвалы скъола-интернаты

ЦХИНВАЛ, 4 мая – Sputnik, Дзæгъиаты Олег. Цхинвалы скъола-интернаты къуырисæры цытджын уавæры бакодтой хæстон кады Музей.

Мадзалы хайад райстой Хуссар Ирыстоны фыццаг вице-премьер Джиоты Константин, Уæрæсейы минæварады уынаффæгæнæг-минæвар Денис Федоров, Россотрудничествойы разамонæг Сергей Комиссаров, республикæйы ахуырады министр Плиты Римма, афтæ ма æхсæнады минæвæрттæ.

Ахуырадон уагдоны директор Сланты Элла бахахх кодта, скъолайы музей кæй сарæзтой уырыссаг æмæ ирон адæмты бирæнусон æмæ æфсымæрон хæларады руаджы.

Уæрæсейы минæварады уынаффæгæнæг-минæвар Денис Федоров банысан кодта, музейы баконд кæй у ахсджиаг æмæ нысаниуæгджын цау.

Цхинвалы скъола-интернаты хæстон кады Музей сарæзтой проект "Рамбылдтам иумæ"-йы фæлгæтты, кæцы æххæст цæуы Уæрæсейы президент Владимир Путины хъæппæрисæй.