ЦХИНВАЛ, 7 май – Sputnik, Дзӕгъиаты Олег. Цхинвалы гимнази "Альбион"-ы ацыд бӕрӕгбонон мадзал "Цифрон мемориал" проект бакӕныны фӕдыл.
Мадзалы хайад райстой Хуссар Ирыстоны фыццаг вице-премьер Джиоты Константин, ахуырады министр Плиты Римма ӕмӕ Россотрудничествойы кусджытӕ.
Скъолайы директор Гуыцмӕзты Ирина банысан кодта, проект "Цифрон мемориал" кӕй у Хуссар Ирыстоны территорийыл Стыр Фыдыбӕстӕйон хӕстӕн цы цыртдзӕвӕнтӕ ис, уыдоны интерактивон картӕ.
"Ацы картӕйы гӕнӕн ис ссарын информаци цыртдзӕвӕны тыххӕй – йӕ бынат, актуалон къам, афтӕ ма нывонд кӕмӕн у, уыцы хъайтары тыххӕй бӕрӕггӕнӕнтӕ. Картӕйы нырма ис "Рамбылдтам иумӕ" проекты фӕлгӕтты цы 66 цыртдзӕвӕны реставраци кӕнынц, уыдонӕй 45, фӕлӕ тагъд рӕстӕджы иннӕтӕ дӕр бафтаудзыстӕм", - фехъусын кодта скъолайы директор.
Гимнази "Альбион"-ы проект "Цифрон мемориал" арӕзт ӕрцыд проект "Рамбылдтам иумӕ"-йы фӕлгӕтты. Хуссар Ирыстоны проект "Рамбылдтам иумӕ" реализаци кӕнынц Уӕрӕсейы президентон грантты фонд ӕмӕ хӕрзаудӕн фонд "Фӕлтӕрты мысӕн".