ЦХИНВАЛ, 8 май — Sputnik, Плиты Фатимӕ. Хуссар Ирыстоны Ленингоры районы бакодтой Советон Цӕдисы Хъайтар Сабанты Григорийы бюст. Цыртдзӕвӕн сӕвӕрдтой Ленингоры поселочы фыццӕгӕм скъолайы кӕрты программӕ "Рамбылдтам иумӕ"-йы фӕлгӕтты, фехъусын кодта районы пресс-службӕйы разамонӕг Кокойты Анжела.
Сабанты Григорий райгуырд Ленингоры районы зӕхкусджыты бинонты. Хӕсты райдианы уый барвӕдонӕй ацыд фронтмӕ, хӕдзары ныууагъта йе ‘мкъай ӕмӕ фондз сывӕллоны.
Уымӕй дарддӕр ма районы ацыд ноджы иу номарӕн мадзал – Ленингоры поселочы дыккӕгӕм скъолайы кӕрты бакодтой Стыр Фыдыбӕстӕйон хӕстӕн нывонд тематикон стенд. Афтӕ ма ахуырадон уагдонӕн балӕвар кодтой ног аппаратурӕ.
Мадзӕлттӕ реализаци скодтой программӕ "Рамбылдтам иумӕ"-йы фӕлгӕтты.