ЦХИНВАЛ, 26 дек - Sputnik. Ног азы къæсæрыл Хуссар Ирыстоны президент Бибылты Анатолий радта паддзахадон хорзæхтæ республикæйы хицæн фадгуыты хуыздæр кусджытæн
Паддзахады разамонæг раарфæ кодт æрæмбырдуæвджытæн ног азы фæдыл, загъта сын сабырдзинад, хæрзиуджытæ æмæ куыстыты æнтыстытты фæндиæгтæ.
"Ӕргомæй уын бузныг дзурын уæ куыстмæ уæ бæрнон ахасты тыххæй. Хуыцау зæгъæт, цæмæй уæ бæрзонд æмвæзады куыст ахъаз уа нæ бæстæйы размæцыдæн. Уадз æмæ Ног 2020 аз уа фæстиуæгджын, дзаг уа ног уæлахизтæ æмæ æнтыстытæй", - загъта Бибылты Анатолий.
Уый фæстæ райдыдта хорзæхкæныны церемони.
Кады æмæ Хæларады ордентæ, майдантæ "Фыдыбæстæ Хъахъхъæнæгæн" æмæ "Хуссар Ирыстоны Фыдыбæстæйон хæсты уæлахизыл 10 азы сæххæсты цытæн", кады грамотатæ райстой Паддзахадон хъахъхъæнынады службæ, УУМ, энергетикæ, ахуырад æмæ культурайы фадгуыты кусджытæн.
Бибылты Анатолий ма радта сгуыхт ахуыргæнæджы нæмттæ Цхуырбаты Ӕхсар, Котолоты Кетеван æмæ Тедеты Аленайæн.
Кадджын ном "Заслуженный работник жилищно-коммунального хозяйства РЮО" радтой Дудайты Людмилæйæн, кадджын ном "Заслуженный сотрудник органов безопасности" – Габаты Людвигæн.
