Цхинвалы скъоладзаутӕн ис уавӕртӕ, цӕмӕй скъолайы программӕйӕ дарддӕр равзарой алыгъуызон кружоктӕ. Ахӕм уӕлӕмхас ахуыр райсыны фадат ис Ӕвзонг натуралистты станцы. Мӕргъиты Ирбег куы радзырдта, афтӕмӕй, цалынмӕ станцы сӕргълӕууӕг ссис, уӕдмӕ дзы уагъта бӕстӕзонӕн кружок.
"Раздӕры хистӕр куыстӕй куы ацыд, уӕд сæвзӕрд сӕргълӕууӕг равзарыны фарст ӕмӕ нӕ кусджыты фӕндонмӕ гӕсгӕ мӕн равзӕрстон хистӕрӕй", - загъта Ирбег.
Йæ ныхӕстӕм гӕсгӕ, бирӕ фарстытӕ ӕмӕ проблемӕтӕ хъуыд скъуыддзаг кӕнын, фӕлӕ хорз коллективы фӕрцы бирӕ ис саразӕн.
"Сывӕллӕтты организацийы разамонӕгӕй кусын ӕнцон нӕу, фӕлӕ чысыл ӕнтыстытӕ куы вӕййы, сывӕллӕтты куы фенын, цингӕнгӕ куыд цӕуынц, уӕд зындзинӕдтӕ фӕстейӕ баззайынц ӕмӕ та мӕ уый сразӕнгард кӕны дарддӕр кусынмӕ", - банысан кодта Мӕргъиты Ирбег.
Кӕд ӕмӕ станцы куыст бирӕ рӕстӕг исы, уӕддӕр, йӕ сӕргълӕууӕг куыд бафиппайдта, уымӕ гӕсгӕ уыцы чысыл ӕнтыстыты фӕрцы куыст цӕуы ӕнцондӕрӕй.
