ЦХИНВАЛ, 29 янв — Sputnik. Хуссар Ирыстоны æвзонг ленкгæнджытæ хайад райсдзысты Ессентукы гом турниры, фехъусын кодта Sputnik ленк кæныны федерацийы президент Евгения Терлеева.
Ацы бонты цхинвайлаг спорты галуан "Олимп"-ы уагъд ӕрцыдысты ленк кӕнынӕй ерыстӕ "Сыгъзӕрин кӕсаг", хайад сӕ райстой 190 хуссарирыстойнаг ӕвзонг спортсмены. Мадзалы рæстæджы æвзæрст цыдысты, республикæйы æддейæ турнирты хайад цы спортсментæ исдзысты, уыдон.
"Ессентукы ерыстæм ацæудзысты астæуккаг кары сывæллæттæ, ныфс нæ ис, кæй æрыздæхдзыстæм призон бынæттимæ. Ленкгæнджытæ сты хорз цæттæ æмæ тох кæндзысты турниры æппæт майдантыл дæр", - радзырдта Терлеева.
Уымæй дарддæр ма цхинвайлаг спортсментæ сæхи цæттæ кæнынц ӕхсӕнадӕмон ерыстæ "MadWave Challenge 2019"-мæ, кæцытæ цæудзысты Мӕскуыйы областы горӕт Рузайы.
