ЦХИНВАЛ, 27 апр — Sputnik, Плиты Фатимӕ. Хуссар Ирыстон баххуыс кӕндзӕн Сирийаг республикӕйӕн дунейы, науӕд та азиаг хъӕзтыты чемпионат рамбулынӕн, фехъусын кодта Хуссар Ирыстоны Олимпиаг комитеты вице-президент Ӕлборты Алан ХИПУ- йы студентӕн интервьюйы рӕстӕджы.
Хӕларадон бӕстӕйӕн абоны онг нырма нӕй олимпиаг чемпион.
"Сирийаг республикӕйӕн дӕргъвӕтин ӕзты нырма сӕ гимн никуы айхъуыст егъау спортивон ерысты. Хъӕбысхӕстӕй, бокс, науӕд та армрестлингӕй мах фӕнды балӕвар кӕнын Сирийӕн дунейы, науӕд та азиаг хъӕзтыты чемпионы. Цхинвалӕй ацӕугӕ спортсмен архайдзӕн Сирийы тырысайы бын ӕмӕ ӕрхӕсдзӕн бӕстӕйӕн бӕлиццаг уӕлахиз", - загъта Ӕлборты Алан.
Уый ма радзырдта, марты кӕрон кӕй хъавыдысты Сиримӕ ацӕуынмӕ, фӕлӕ сын сӕ фӕндтӕ бахъыгдардта коронавирусы ӕндӕвдад дунейыл.
Сири банымадта Хуссар Ирыстон ӕмӕ Абхазы хӕдбардзинад 2018 азы майы. Сирийы кусӕгон балцы уыд президент Бибылты Анатолий, бӕстӕтӕ сфидар кодтой дипломатон ахастытӕ ӕмӕ бафыстой цалдӕр бадзырды. Ацы аз майы та бӕстӕты хсӕн бафыстӕуыд бадзырд дыууӕ республикӕйы территоритыл базарадон хӕдзӕртты баконды фӕдыл.
