07:01 14 ХУЫМГÆНÆНЫ МÆЙ 2021
Комкоммӕ эфир
  • EUR91.92
  • USD77.25
Спорт
Чысыл дӕнцӕг
7430

Цъоны дӕлвӕзы бырӕн трассӕ рауӕрӕх ис, фӕзынд дзы егъау хъармгӕнӕн пункт, ратрак ӕрцыд цалцӕггонд

ЦХИНВАЛ, 11 янв — Sputnik, Плиты Фатимӕ. Хуссар Ирыстоны иунӕг къахдзоныгътыл бырӕн трассӕ "Цъон" скусдзӕн ӕввахс бонты, фехъусын кодта Sputnik туризмы управленийы разамонӕг Плиты Вадим.

Волонтерты ӕххуысӕй  зымӕгон улӕфӕндоны фӕзынд хъармгӕнӕн пункт, бырӕн фӕзуаты дӕргъ скодтой 2 километры онг. Цъоны ногдзинӕдтӕ фӕзындысты спорты комитеты фӕрӕзтӕй, фӕлӕ ӕппӕт дӕр арӕзт цӕуы бархион ӕххуысгӕнджыты фӕрцы.

"Раздӕры рӕстӕгмӕ цатырты бӕсты Цъоны ӕвӕрд ӕрцыд ӕдзухон хъармгӕнӕн пункт 54 квадратон метры бӕрц. Арӕзтады ма хъӕуы чысыл баххӕст кӕнын, фӕлӕ нӕ боныгъӕд абон баурӕдта - Цъоны мит ныккалдта. Ногдзинӕдтӕм ма бахӕссӕн ис уый дӕр, ӕмӕ трассӕ ныр иу ахӕм кӕй фӕдаргъдӕр ис. Кӕд раздӕр йӕ дӕргъ уыд 900 метры, уӕд ныр та у 2 км", - радзырдта Плиты  Вадим.

Туризмы управленийы разамонӕг ма бафтыдта, зымӕгон улӕфӕн бынаты ӕввахс бонты волонтеты фӕрцы скусдзӕн, цалцӕг ӕрцыд ратрак дӕр.

"Спорты комитет дӕр баххуыс кодта, фӕлӕ тынг стыр лӕггад бакодтой ӕххуысгӕнджытӕ.  Цалдӕр бон уым куыстой ӕнӕрцӕугӕйы, нӕдӕр сӕ хӕс уыд, нӕдӕр сын ӕхца фыстой, афтӕмӕй. Уыдон фӕрцы ацы иумӕйаг хъуыддагӕн бантыст саразын",- балхынцъ кодта уый.

Сӕйраг темӕтӕ