ЦХИНВАЛ, 4 июн — Sputnik. Ирон уӕлибыхты презентаци уагъд ӕрцӕудзӕн Италийы сӕйраг горӕт Миланы, хъусын кӕны Уӕрӕсейы президенты цур Цӕгат Ирыстоны иудадзыг минӕварады пресс-службӕ.
Презентаци уагъд ӕрцӕудзӕн ӕппӕтдунейон равдыст "EXPO-2015" — ы фӕлгӕтты. Информацион ӕххуыс ын бакодта Уӕрӕсейы президенты цур Цӕгат Ирыстоны иудадзыг минӕварад.
"Ацы ӕхсӕндунейон форумы фыццаг хатт хайад райсдзӕн ирон уӕлибыхты аразӕг компани "Нӕртон". Презентаци цӕудзӕн 6 ӕмӕ 7 июны Миланы. Ирон экспозици ӕвдыст ӕрцӕудзӕн Кавказаг къӕбицы бонты, EXPO-2015 — ы Уӕрӕсейы павильоны", — дзырдӕуы хъусинагы.
Уӕрӕсейы президенты цур Цӕгат Ирыстоны иудадзыг минӕварады кусджытӕ ӕмӕ Мӕскуыйы ирон студенты ӕхсӕнады минӕвӕрттӕ уыцы бонты кусдзысты равдысты Уӕрӕсейы павильоны ӕмӕ зонгӕ кӕндзысты уазджыты Ирыстоны уникалон националон хӕринагимӕ — уӕлибыхтимӕ.
"EXPO-2015"-мӕ фӕуазӕг уыдзӕн Уӕрӕсейы президент Владимир Путин дӕр.
Ӕппӕтдунейон равдыст "EXPO-2015" фондз аз иу хатт хайадисӕг бӕстӕты минӕвӕрттӕн ратты уникалон фадат, цӕмӕй равдисой раззагон зонадон ӕнтыстдзинӕдтӕ хицӕн ӕмӕ хицӕн фадгуыты. EXPO-2015 йӕ куыст кӕндзӕн 31 октябры онг.
