ЦХИНВАЛ, 31 июл — Sputnik. Ӕхсӕнадон ленкгӕнӕн бассейн "Дельфин" ногӕй скусдзӕн 1 августмӕ, фехъусын кодта майрӕмбоны Sputnik фӕсивӕдон политикӕ, спорт ӕмӕ туризмы комитеты сӕрдар Зассеты Сергей.
Комплекс арӕз ӕрцыд 2012 азы Цхинвалы цӕгаттаг хайы. "Дельфин" у республикӕйы иунӕг ӕхсӕнадон бассейн. Ам фадӕттӕ арӕзт ис куыд хистӕр кары адӕмӕн, афтӕ сабитӕн дӕр. Бассейн ифтонг у нырыккон донсыгъдӕгкӕнӕн техникӕйӕ.
"Ӕппӕт техникон згъуыдтытӕ иуварс ӕрцыдысты, бассейны куысджыты куыстмызды проблемӕ дӕр скуыддзаг ӕрцыд. Сомӕй фӕстӕмӕ "Дельфин" бакӕндзӕн йӕ дуӕрттӕ", — загъта Зассеты Сергей.
Арӕзтады фӕудӕй фӕстӕмӕ бассейн бацыд горӕты администрациийы дӕлбар, 2015 азы та йӕ радтой фӕсивӕдон политкӕ, спорт ӕмӕ туризмы комитетмӕ.
Бассейн 2 азӕй 70 азы кары онг алкӕйдӕр исы. Ис дзы дыууӕ хайад — хистӕн кары адӕмӕн ӕмӕ сывӕллӕттӕн 12 азы кары онг. Бассейнмӕ бацӕуӕн у аргъыл, стӕй ма ленккӕнджытӕм хъуамӕ уа ӕнӕниздзинад бӕлвырдгӕнӕн гӕххӕт дохтыртӕй.
