ЦХИНВАЛ, 5 авг — Sputnik. Донбассы редакцион хæслæвæрд æххæстгæнгæйæ, МИА "Россия сегодня"-йы фӕмардуӕвӕг фотокорреспондент Андрей Стенины хуыздӕр куыстыты фотоальбом "Зона конфликта"-йæн презентаци уыдзæн 6 августы Мæскуыйы.
Андрей Стенин æбæрæгæй фесæфт редакцион хæслæвæрд æххæстгæнгæйæ 2014 азы августы райдианы Донецкы областы горæт Снежноейы, цыран украинӕйаг æфсад уагъта сæрмагонд операци хæдæфсады ныхмæ.
МИА "Россия сегодня"-йы гендиректор Дмитрий Киселев 3 сентябры фехъусын кодта, кæй райста æвдисæн бæрæггæнæнтæ, журналист кæй фæмард 6 августы, украинæйаг æфсад автоколоннæ æхсты бын куы фæкодта, уӕд.
Профессионалон хæс æххæстгæнгæйæ равдисгæ хъæбатырдзинады тыххæй Стенин фæсмæрдонæй хорзæхджын ӕрцыд Хъæбатырдзинады орденæй.
Журналисты амæлæты афӕдзмӕ рацæудзæн Стенины куыстыты альбом "Зона конфликта", цыран йе ‘мбæлттæ æмæ коллегæтæ æрæмбырд кодтой йæ цымыдисондæр куыстытæ. Альбомæн презентаци уыдзæн МИА "Россия сегодня"-йы пресс-конференцийы рæстæджы, хайад дзы райсдзысты массон информацийы фæрæзты къухдариуæггæнджытæ æмæ фæмардуæвæджы коллегæтæ.
"Адæймаг у удæгас уæды онг, цалынмæ йæ хъуыды кæнынц. МИА "Россия сегодня" Андрейы куыстытимæ цы фотоальбом рауагъта, уый æвдисæн у, кæй никуы уыдзæн махæй рох. Ацы рауагъд æвдисы нæ ахаст Андреймæ, куыд коллегæмæ, æмгармæ æмæ профессионалмæ",- загъта МИА "Россия сегодня"-йы фотоинформацийы иугонд дирекцийы хистӕр Александр Штоль.
2014 азы 22 декабры, Стенины райгуырæн боны, МИА "Россия сегодня" æрæвæрдта бындур йæ номхæссæг Фотожурналистикæйы æхсæнадæмон конкурсæн. Андрей Стенины номыл Фотожурналистикæйы æхсæнадæмон конкурс агентад уадзы ЮНЕСКО-йы хъуыддæгты фæдыл УФ-йы къамисы эгидæйы бын. Конкурсы сæйраг нысан у фотожурналистикæйы хæслæвæрдтæм æхсæнадон хъусдард аздахын æмæ æрыгон нывисджытæн феххуыс кæнын сæ профессионалон тырнынады.
