ЦХИНВАЛ, 8 авг — Sputnik. Вахтанговы номыл мæскуыйаг театр цæттæ у Цæгат Ирыстоны зынгæ театралон архайæджы хæдзар-музей саразыны хъуыддаг йæхимæ райсын, хъусын кæны ГТРК АЛАНИЯ.
Уый тыххæй театры къухдариуæгад фехъусын кодта Дзæуджыхъæуы пресс-конференцийы рæстæджы.
Артисттæ нымайынц, Вахтангов цы хæдзары цард, уым æнæмæнгхъæуæг кæй у музей саразын. Бæстыхай хъæуы бацалцæг кæнын, кæцыдæр фатерты нырма ис цæрджытæ. Артисттæ æрсидтысты республикæйы æмæ Дзæуджыхъæуы къухдариуæгадмæ ацы хъуыдыйы фарс балæууын.
"Куы бацыдыстæм Вахтангов кæм цард, хъомыл кодта, уӕд федтам, хæдзары кӕй ис коммуналон фатертæ. Хъыг нын у. Мах æй æмбарæм, куыд зын у ацы хъуыды сæххæст кæнын, фæлæ цæттæ стæм нæ бон цы у, уымæй баххуыс кæнынмӕ",- загъта Вахтанговы номыл Мæскуыйаг академион театры директор Кирилл Крок.
Артисттæ Людмила Максакова, Сергей Маковецкий, Владимир Симонов, Евгений Князев, Владимир Вдовиченков дзæуджыхъæуккаг публикæйы схуыдтой куыд иууыл фæлмæнзæрдæ. Артистты дисы бафтыдтой æрдзы рæсугъддзинад æмæ горæты зæронд хай.
Мæскуыйаг уазджытæ загътой, кæй аскъуыддзаг кодтой Дзæуджыхъæуы равдисын иууыл цымыдисондæр спектаклтæ.
Зынгæ театры коллектив æрцыд федералон программæ "Большие гастроли"-йы фæлгæтты ахæм лозунгимæ "Вахтанговы театр —Вахтанговы райгуырæн бæстæйæн".
Цалдæр боны дæргъы аивадуарзджытæн равдисдзысты фараст спектаклы. Сценæмæ рахиздзысты ахæм легендæтæ, куыд Владимир Этуш æмæ Василий Лановой.
