ЦХИНВАЛ, 11 сен — Sputnik. Италийы Ирон культурæйы бонты фæлгæтты Римы байгом аивадон равдыст"Атриум". Сæ куыстытæ дзы равдыстой Хуссар æмæ Цæгат Ирыстоны республикон аивæдты лицейты ахуыргæнджытæ æмæ студенттæ, фехъусын кодта Sputnik равдысты организатор, ассоциаци " Сæндидзæн"-ы сæргълæууæг Пухаты Радион.
Равдыст бацæттæгонд æрцыд Римы уæвæг Культурæ æмæ зонады уæрæсейаг центры (КЗУЦ) æххуысæй.
"Центры залты æвæрд æрцыдысты 40 куысты, алкæцы дæр дзы у ирд æмæ философон, ахорæнтæй йемыдзаг, царды æрвылбонон циндзинæдтыл дзурæг, райгуырæн зæххы æрдзы рæсугъддзинæдтæ, эпикон хъайтарты æмæ националон эпосы кадджыты æвдисæг", — радзырдта Радион.
Хуссар Ирыстоны аивæдты лицейы директор, Хуссар Ирыстоны аивадон скъолайы хуыздæр ахуыргæнджытæй сæ иу — Кæсойты Лаврент балæвар кодта КЗУЦ-æн лицейы юбилейы цытæн рауагъдгонд ирон нывгæнджыты репродукциты альбом. Дзæуджыхъæуы республикон аивæдты лицейы директоры хæдивæг Толпарты Марина сæххæст кодта нырыккон ирон композитор Мæхъойты Ацæмæзы уацмыстæй цалдæр.
Римы уæвæг КЗУЦ-ы директор Олег Осипов бæрзонд аргъ скодта организаторты хъæппæрисæн, куыстыты æмвæзадæн æмæ фæндон бахаста дарддæры æмгуыстадæн.
