ЦХИНВАЛ, 17 сен — Sputnik. Президент Тыбылты Леонид цыппæрæмы фембæлд альпинисттимæ — Паддзахадон æдасдзинады комитеты (ПÆК) кусджытимæ, кæцытæ схызтысты Хуссар Ирыстоны иууыл бæрзонддæр хохы сӕрмӕ æмæ сын бузныджы ныхæстæ загъта, сæ разы æвæрд хæслæвæрд æнтыстджынæй кæй сæххæст кодтой, уый тыххӕй.
ПÆК-ы кусджыты къорд сарæзта хæрдмæцыд Халацайы хохмæ (денджызы ӕмвӕзадӕй 3938 метры бӕрзӕндӕн), цыран æрфидар кодтой хуссарирыстойнаг тырыса æмæ зæрдылдарæн капсул республикæйы 25 азы юбилейон датæйы цытæн майданимæ.
"Ацы хæрдмæцыд дзурæг у ууыл, æмæ сымах кæддæриддæр цæттæ стут паддзахадон хæслæвæрдтæ æххæст кæнын. Фидарæй мæ уырны, ПÆК-ы коллектив дарддæр дæр кæй æххæст кæндзæн республикæ æмæ къухдариуæгады раз цы хæслæвæрдтæ æвæрд сты, уыдон", — загъта президент.
Бæстæйы сæргълæууæг йæ къух бафыста указтыл, цæмæй хæрдмæцыды хайадисджытæн иууылдæр лæвæрд æрцæуой паддзахадон хорзæхтæ республикæйы юбилейы цытæн.
Комитеты сæрдар Виктор Шаргаев президентæн радта ведомствæйон хорзæх Хуссар Ирыстоны æдасдзинад хъахъхъæныны сгуыхтдзинæдты тыххæй.
"Ды уыдтæ республикæйы ПÆК-ы фыццаг сæрдар, националон сæрмагонд службæты райрæзтмæ æмæ Хуссар Ирыстоны æдасдзинад бæрзонд æмвæзадыл дарынмæ бахастай уæзджын хайбавæрд", — загъта Шаргаев.
Хæрдмæцыд баст уыд юбилейон датæимæ — республикæйы расидтыл 25 азы бонмæ, кæцы Хуссар Ирыстон нысан кæны хуыцаубоны, 20 сентябры. Альпинистты къорды сконды уыд 18 кусæджы, кæцытæн ис фæлтæрддзинад æнгæс балцты. Хæрдмæцыды сæргъ лæууыд ведомствойы сæрдары хæдивæг Гулиты Василий.
