Цхинвал, 17 сен — Sputnik. Хуссарирыстойнаг кафты ансамбль "Скифтӕ" ӕхсӕнадӕмон олимпиадӕ "Рӕсугъддзинад ӕмӕ зӕрдӕхæлардзинад — дуне ирвӕзынгӕнджытӕ"-йы бацахстой фыццаг бынат. Уымӕй дарддӕр ма коллективы къухы бафтыд Артистон комитеты Кубок, фехъусын кодта Sputnik ансамблы аивадон къухдариуӕггӕнӕг Быценты Геннадий.
Ансамбль "Скифтӕ" архайы Колыты Аксойы номыл аивӕдты паддзахадон лицейы дӕлбар. "Скифтӕ" радтой 150 концерты онг, хорзӕхджын сты Хуссар Ирыстон, Кӕсӕг-Балхъары Республикӕйы хицауадон хорзӕхтӕй, сты бирӕнымӕц ӕхсӕнадӕмон конкурсты ӕмӕ фестивалты уӕлахиздзаутӕ.
"Хорз цӕттӕдзинад равыдстой нӕ кафджытӕ, райгонд дӕн сӕ архайдӕй. Сӕххӕст кодтой дыууӕ номыры — "Симд" ӕмӕ "Бӕрӕгбонон кафт". Нӕ коллективы ӕмрӕнхъ сӕ арӕхстдзинад равыдстой Уӕрӕсейы регионты куридиатджын коллективтӕ ӕмӕ фӕсарӕйнаг кафджытӕ. Уыдоны ӕхсӕн мах разындыстӕм хуыздӕр", — загъта Быценты Геннадий.
Уый ма фехъусын кодта, симды раздзӕуӕг къай — Хъодалаты Дзерӕсса ӕмӕ Бибылты Ацӕмӕз хорзӕхджын кӕй ӕрцыдысты сыгъзӕрин майдантӕй.
Хореографийы ӕхсӕнадӕмон олимпиадӕ "Рӕсугъддзинад ӕмӕ зӕрдӕхæлардзинад — дуне ирвӕзынгӕнджытӕ" уагъд цыд 11-16 сентябры Лазаревскы. Ардӕм "Скифтӕ" хуынд ӕрцыдысты, куыд регионалон ӕвзарӕн туры уӕлахиздзаутӕ.
