Цхинвал, 17 сен — Sputnik. Цхинвалы ӕртыккӕгӕм астӕуккаг скъолайы ахуырдзауты ӕхсӕн скъолай директоры фӕззыгон Кубок рамбулыны сӕраппонд уагъд ӕрцыдысты ерыстӕ. Мадзалмӕ фӕуазӕг Sputnik уацхӕссӕг дӕр.
Скъоладзаутӕ Октябры уынджы ног ӕвӕрд асфальтыл сӕ тыхтӕ ӕвзӕрстой 400, 800 ӕмӕ 1500 метрмӕ лидзынӕй, армспортӕй ӕмӕ спорты ӕндӕр хуызтӕй. Сӕ архайдӕн сын аргъ кодта физкультурӕйы сгуыхт кусӕг Гатыгкоты Василий.
"Ахӕм ерыстӕ уадзӕм 2010 азӕй фӕстӕмӕ. Ивгъуыд азты-иу скъолайы директоры кубок рамбулыны ерыстӕ уагътам октябры, фӕлӕ нӕ ацы аз бафӕндыд, цӕмӕй Республикӕйы юбилей спортивон мадзалӕй банысан кӕнӕм", — радзырдта директор Бестауты Мадина.
Йӕ ныхӕстӕм гӕсгӕ, спортивон ерыстӕ рӕзгӕ фӕлтӕртӕн дӕттынц патриотикон хъомылад, скъоладзаутӕ фидар кӕнынц се ‘нӕниздзинад ӕмӕ спортивон цӕттӕдзинад.
"Мадзалӕн ма ис монон-фӕткӕвӕрдон нысаниуӕг дӕр", — банысан кодта директор.
Ӕвзонг спортсментӕн ма раарфӕ кӕнынмӕ ӕрбацы РХИ фӕсивӕдон политикӕ ӕмӕ спорты комитеты сӕрдар Зассеты Сергей.
Ерыстӕ рамбылдта 7-ӕм къласы командӕ ӕмӕ ныр иу афӕдзы дӕргъы сӕ къласы ӕрфысым уыдзӕн директоры фӕззыгон кроссы Кубок.
Ерыстӕ организацигонд ӕрдысты скъолайы коллективы тыхтӕй. Се ‘ ххуысы къух ма сӕм фӕдардтой Паддзахадон Автоинспекци, Зынгирвӕзты ныхмӕ тохы сужбӕ ӕмӕ Спорты комитет.
