ЦХИНВАЛ, 24 сен — Sputnik, Хъотайты Мария. Инциденттӕ ма руадзыны ӕмӕ аиуварс кӕныны фӕдыл механизмты фӕлгӕтты фембӕлды хайадисджытӕ ӕрдзырдтой Хуссар Ирыстоны Знауыры районы арӕнгӕрон хъӕу Иончайы цӕрӕджы фехсыны цауыл, фехъусын кодта журналисттӕн хуссарирыстойнаг делегацийы сӕргълӕууӕг Гаглойты Хох фембӕлды фӕстӕ.
"Райстгонд информацимӕ гӕсгӕ Гуырдзыстоны ‘рдыгæй фехстой Знауыры районы цӕрӕджы, кӕцы тракторыл куыста быдыры. Ӕхсты фӕстиуӕгӕн фæцæф йæ къух. Информаци фехъусын кодтой фембӕлды хайадисджытӕн", — загъта Гаглойты Хох.
Уый ӕмрӕстӕджы уый банысан кодта, ацы цаумӕ ӕнӕкӕсгӕйӕ, фембӕлды хайадисджыты нымадмӕ гӕсгӕ, иумӕйагӕй арӕныл уавӕр у стабилон ӕмӕ сабыр.
Раздӕр фембӕлды рӕстӕджы хайадисджытӕ банысан кодтой, кӕй фӕкъаддӕр арӕны инцидентты нымӕц.
Ӕххӕстбарджын минӕвары хӕдивӕг ма фехъусын кодта, июлы Знауыры районы арӕнгӕрон хъӕу Цънелисы хуссарирыстойнаг арӕнхъахъхъӕнджытӕ федтой, Евроцӕдисы миссийы патруль кӕй ныхас кӕны бынӕттон цӕрджытимӕ. Уый та, республикӕйы къухдариуӕгады нымадмӕ гӕсгӕ, у фӕткхалӕн цау.
"Мах фехъусын кодтам хайадисджытӕн, ацы диалог уадзыны цау кӕй нӕ уыд раст, уымӕн ӕмӕ ахӕм коммуникаци кӕнӕ сӕтты арӕн цӕстдарджыты ӕрдыгӕй, кӕнӕ та йӕ сӕттынц бынӕттон цӕрджытӕ сӕхӕдӕг. Уымӕ гӕсгӕ дарддӕр нал хъӕуы уадзын ахӕм диалогтӕ", — нымайы хуссарирыстойнаг делегацийы сӕргълӕууӕг.
ИРИМ-ы радон фембӕлд уагъд ӕрцӕудзӕн 29 октябры.
