ЦХИНВАЛ, 24 сен — Sputnik. Дудайты Эрикы фæмардæй Хуссар Ирыстон фесæфта йæ уарзон хъæбулы, загъта цыппæрæмы Sputnik парламенты депутат Адæмон партийæ Диакъонты Амиран.
Адæмон партийæ парламенты депутат Дудайты Эрик фæмард æртыццæджы автомобилон аварийы 37 азы кары. Баззад ын ус æмæ æртæ сывæллоны.
"Эрик уыд йæ Райгуырæн бæстæйы æцæг патриот æмæ намысджын адæймаг. Тынг рагæй йæ зонын, фæлæ фембал стæм парламенты. Йæ ацыдимæ амард мæ иу хай дæр", — загъта Диакъонты Амиран.
Уый ма банысан кодта, Дудайты Эрик кæй иста активон хайад Хуссар Ирыстон Гуырдзыйы агрессийæ бахъахъхъæныны. Гуырдзиаг тыхон структурæтæ цалдæр хатт бафæлфæрдтой йæ амарыныл.
"Гуырдзиаг сæрмагонд службæтæ дæргъвæтин рæстæг зылдысты йæ фæстæ. Тыххæй аирвæзт 2007 азы гуырдзиаг сæрмагонд службæты теракты фæстиуæгæн. Уæд удæгасæй аирвæзт, ныр та фæмард ахæм абсурдон мæлæтæй", — загъта Дудайты Эрикы æмгар.
Дудайты Эрик Владимиры фырт райгуырд 1978 азы 2 майы Хуссар Ирыстоны Цхинвалы районы Арцеуы хъæуы. Каст фæци Арцеуы астæуккаг скъола. 2011 азы ссис ХИПУ-йы юридикон факультеты рауагъдон. 1996-2009 азы куыста Хъахъхъæнынады министрады, службæ кодта фидауынгæнæн тыхты. 2009 азы ссис парламенты депутат, лæууыд Хъахъхъæнынад æмæ æдасдзинады комитеты сæргъ. 2014 азы ногæй равзæрст æрцыд парламенты депутатæй. Хорзæхджын æрцыд "Фыдыбæстæ хъахъхъæнæджы" майданæй.
