ЦХИНВАЛ, 28 сен — Sputnik. Хуссарирыстойнаг нывгӕнджытӕ хайад исынц ӕхсӕнрегионалон равдыст "Южный ветер"-ы Дзӕуджыхъӕуы, фехъусын кодта Sputnik РХИ нывгӕнджыты цӕдисы сӕрдар Цхуырбаты Тамерлан.
Ӕхсӕнрегионалон равдыст "Южный ветер" йӕ куыст райдыдта майрӕмбоны Дзӕуджыхъӕуы. Мадзалы адӕмы размӕ рахастой ӕппӕт Цӕгат Кавказы республикӕты ӕмӕ УФ бирӕ горӕтты ӕвзонг нывгӕнджыты хуыздӕр куыстытӕ, уыдоны ӕхсӕн сты хуссарирыстойнаг нывгӕнджыты куыстытӕ дӕр.
"Хуссар Ирыстоны Нывгӕнджыты цӕдисы минӕвӕрттӕ Джиоты Вадим, Гаглойты Дзерасса ӕмӕ Зассеты Владимир бавдыстой сӕ куыстытӕ. Дзерассӕ архайы нывкӕнынады декоративон-авангардон фадыджы, Вадим- символикон нывкӕнынады фадыджы националон колоритимӕ. Владимир фылдӕр бӕрцӕй ныв кӕны ӕрдзы рӕсугъддзинад", — банысан кодта Цхуырбаты Тамерлан.
Равдыст гом уыдзӕн 25 октябрмӕ. Мадзалмӕ сӕ куыстытӕ бавдыстой куыд фӕлтӕрд ӕмӕ номдзыд нывгӕнджытӕ, афтӕ ма нывкӕнынады фӕндагыл ӕрӕджы чи слӕууыд, уыдон дӕр. Равдыст ӕмрӕстӕджы цӕуы Дзӕуджыхъӕуы ӕртӕ залы.
