ЦХИНВАЛ, 28 сен — Sputnik. Уӕгъдибар хъæбысхæстӕй II турнир Къуаисайы рабӕрӕг кодта скъолайы кары тыхджындӕр богалты, фехъусын кодтой Sputnik фӕсивӕдон политикӕ, спорт ӕмӕ туризмы комитеты пресс-службӕйы.
Хуссар Ирыстоны хъайтар Тедеты Владимиры номарӕн турнир уӕгъдибар хъӕбысхӕстӕй уагъд ӕрцыд ныр дыккаг хатт.
"Турниры хайадисджытӕн раарфӕ кӕнынмӕ ӕрбацыдысты республикӕйы къухдариуӕгад президент Тыбылты Леониды сӕргълӕудӕй, цытджын уазджытӕ фӕсарӕнтӕй ӕмӕ ирон номдзыд спортсментӕ", — радзырдта уагдоны пресс-секретарь Хуриты Батрадз.
Турнир Къуыдаргомы ӕрӕмбырд кодта 140 спортсмены Дагъыстан, Кӕсӕг-Балхъар ӕмӕ Ирыстоны дыууӕ хайы алы къуымтӕй. Хицӕн уӕзы категориты ерысты уӕлахиздзаутӕ ссисты 12 хъӕбысӕйхӕцӕджы, цалдӕр спортсмены та райстой сӕрмагонд призтӕ.
Къуаисамӕ уӕгъдибар хъæбысхæстӕй II турнирмӕ ӕрцыдысты номдзыд ирон спортсментӕ — дунейы Кубокы хицау Хъайсынты Георгий, дунейы ӕмӕ Европӕйы чемпион Таймӕзты Тимур, ӕвзӕнгты ӕхсӕн Европӕйы фыццагады уӕгъдибар хъӕбысӕйхӕсты чемпион Лӕууойты Сослан ӕмӕ ӕндӕртӕ.
