ЦХИНВАЛ, 29 сен — Sputnik, Хъотайты Мария. Мариинаг театры оперон зарæггæнджыты академийы солисттæ сæ арæхстдзинад равдыстой Æлборты Феликсы номыл цхинвайлаг музыкалон ахуыргæнæндоны сценæйыл.
Къаннæг зал йемыдзаг уыд сценæмæкæсджытæй. Микаэл Таривердиевы романстæ, Чайковскийы оперæты аритæ, Пуччини, Рахманинов зæлдысты концертон залы. Æрыгон зарæггæнæг Дмитрий Гарбовский, аргентинæйаг уазæг Карлос Д'Онофрио, аив сопранойы хицау Наталья Павлова æмæ не `мзæххон, "Ла Скала"-йы стажировкæ цæуæг Джиоты Иринæ.
Артистты номырты нæ уыд, классикон музыкæйы изæрты арæх цы фæллайæн уæз вæййы, уый. Рог æмæ фæсмæрæй, хуымæтæг джинсты æмæ пиджакы конд, Дмитрий Гарбовский æххæст кодта Микаэл Таривердиевы романстæ. Аргентинӕйаг оперон зарæггæнæг Карлос Д'Онофрио уайтагъд ссардта иумæйаг æвзаг сценæмæкæсджытимæ. Уæлдай тынгдæр та фæцыд сылгоймæгты зæрдæмæ йæ табугæнæн ахастæй. Аргентинæйаг артист цы "Иу сæры танго" сæххæст кодта, уый фæстæ нæ сабыр кодтой къухæмдзæгъд æмæ хъæр "бис!".
Чайковскийы оперæ "Русалка"-йы вазыгджын аритæ Наталья Павловайы сæххæстæй ныууагътой ирд тæлмæнтæ табугæнджыты зæрдæты. Залы разынд классикон музыкæйы зонджытæ, кæцытæ æнтыстджынæй æмзард кодтой артисттимæ.
Нæ республикæмæ дыккаг хатт фæуазæг не `мзæххон, дзæвгар конкурсты лауреат Джиоты Иринæ. Элеонорæйы арийы сæххæст равдыста зарӕггӕнӕджы хъæлæсы алыварсондзинад æмæ сыгъдæгдзинад. Сценæмæкæсджыты æхсæн уыд йæ астаздзыд лæппу дӕр, кæцы арæх вæййы йæ мадимæ гастролты.
Арфæгæнæг аивадуарзджытæ хастой дидинджытæ артисттæн. Уыдон сразы кодтой Джиоты Иринæйы, Павлова æмæ Д'Онофриойы ноджы иу ари сæххæст кæнын.
Концерты рæстæджы Джиоты Иринæйæн лæвæрд æрцыд Хуссар Ирыстоны сгуыхт артисты ном. Йæ коллегæтæн та лæвæрд æрцыдысты зæрдылдарæн лæвæрттæ.
Концерт уагъд æрцыд 10-æм æхсæнадæмон фестиваль "Гергиты Ларисæмæ уазæгуаты"-йы фæлгæтты. Раздæр фестиваль Хуссар Ирыстоны байгом кино æмæ театры артист Сергей Безруковы аивадон изæрæй.
