ЦХИНВАЛ, 30 сен — Sputnik. Хуссарирыстойнаг боксертæ бацахстой призон бынæттæ тренер Георгий Стаценкойы номыл æппæтуæрæсейаг турниры, кæцы уагъд æрцыд Ростовы областы, горæт Аксайы, фехъусын кодта Sputnik дыццæджы Цхинвалы сывæллæтты спортивон скъолайы тренер Чехойты Алан.
Тренеры ныхæстæм гæсгæ, Хуссар Ирыстонæй турниры хайад райстой йæ хъомылгæнинæгтæй дыууæйæ: 69 килограммы уæзы категорийы Коцты Вадим (1998 а.г.) æмæ 64 килограммы уæзы категорийы Коцты Владислав (1999 а.г.)
"Владислав ныфсджынæй ауагъта развæлгъау тохтæ, фæлæ финалы йæ ныхмæлæууæг, ростоваг боксер разынд тыхджындæр. Фембылдмæ æнæкæсгæйæ Владислав йæхи равдыста ирдæй æмæ йын лæвæрд æрцыд приз турниры иууыл хуыздæр тохы тыххæй", — загъта Чехойты Алан.
Коцты Вадим та кæд развæлгъау этапты тохтæ ауагъта æнтыстджынæй, уæддæр йæ къухты бафтыд æрмæстдæр бронзæ майдан.
Æрыгон спортсменты тренер райгондæй баззад, йæ хъомылгæнинæгтæ сæхи куыд равдыстой, уымæй. Банысан кодта, боксертæ сæ спортивон формæйы тæмæны кæй нæма сты. Коцты Владислав та ахæм æмвæзады турниры архайдта фыццаг хатт.
