ЦХИНВАЛ, 1 окт — Sputnik. Хетӕгкаты Къостайы номыл Хуссар Ирыстоны драмон театр йӕхи цӕттӕ кӕны ног, 85 театралон сезонмӕ, аивадуарджытыл труппӕ сӕмбӕлдзӕн мистикон трагеди "Дзӕнӕты фӕндаг зындонмӕ"-йӕ, фехъусын кодта Sputnik театры директор ӕмӕ аивадон къухдариуӕггӕнӕг Къацты Филипп.
Ног театралон сезон баконд ӕрцӕудзӕн 15 октябры.
"Бакӕндзыстӕм сезон трагеди "Дзӕнӕты фӕндаг зындонмӕ"-йӕ. Спектакль сӕвӕрыныл ныр дӕргъвӕтин рӕсӕтӕг кусы актерты къорд режиссер Дзуццаты Тамерланы сӕргълӕудӕй", — банысан кодта директор.
Трагеди ӕвӕрд цӕуы поэт, фыссӕг ӕмӕ РХИ адӕмон артисткӕ Галуанты Людӕйы уацмыс "Дзӕнӕты фӕндаг зындонмӕ"-мӕ гӕсгӕ. Театры труппӕ режиссер Дзуццаты Тамерланы сӕргълӕудӕй ацы спектаклыл кусы ивгъуыд азӕй фӕстӕмӕ.
Къацты Филиппы ныхӕстӕм гӕсӕгӕ, фӕстаг азты театры репертуары фылдӕр бӕрц сты трагедитӕ, ӕмӕ нырӕй фӕстӕмӕ та ӕрхайдзысты рог уацмыстӕ ӕмӕ комедитӕ ӕвӕрыныл.
"Фӕнды нӕ бахъӕлдзӕг кӕнын адӕмы зӕрдӕтӕ ӕмӕ уымӕ гӕсгӕ сӕвӕрдзыстӕм комедитӕ. Ис хорз ирон ӕрмӕг, зӕгъӕм "Софияйы зарӕг", "Кӕмдӕр ирон лӕппутӕ зарынц" ӕмӕ ӕндӕртӕ. Ис нӕм хорз актертӕ, кӕцытӕ ӕмрӕстӕджы сты курдиатджын артисттӕ ӕмӕ зарӕггӕнджытӕ дӕр", — банысан кодта уый.
Трагеди "Дзӕнӕты фӕндаг зындонмӕ"-йы ӕвдыст цӕуы наркоманийы фарст ӕмӕ фӕсивӕды проблемӕтӕ. Спектаклы архайынц театры артисттӕ авдӕй.
