ЦХИНВАЛ, 1 окт — Sputnik. Уӕлвӕткон уавӕрты министрады ирвӕзынгӕнджытӕ сбӕлвырд кодтой, кӕй сын ис кусыны бар техногенон бӕллӕхты рӕстӕджы ӕмӕ хӕххон уавӕрты, фехъусын кодтой Sputnik УУМ пресс-службӕйы.
"Аттестацион ахуырты фӕлгӕтты ирвӕзынгӕнджытӕ ӕххӕст кодтой хыгъдон хӕслӕвӕрдтӕ, кӕцытӕ сын бар ратдзысты хӕххон уавӕрӕты ӕмӕ техногеннон бӕллӕхты рӕстӕджы кусын", — загътой УУМ.
Ирвӕзынгӕнджыты бахъуыд тыхст адӕймаджы айнæг къæдзæхӕй ӕруадзын ӕмӕ йӕ стӕй цӕугӕдоныл дохтырты къухмӕ фӕхӕццӕ кӕнын.
Ноджы ма иу зиан баййафӕг адӕймаджы ирвӕзынгӕнджытӕ сӕрмагонд ифтонггарзы фӕрцы ссӕрибар кодтой бетоны къӕйы бынӕй ӕмӕ йӕ стӕй цӕугӕдоныл фӕхӕццӕ кодтой бынатмӕ.
Уагдоны сӕргълӕууӕг Санахъоты Сергей бафиппайдта, ахуыртӕ кӕй ацыдысты ӕнтыстджынӕй, ирвӕзынгӕнджытӕ сбӕлвырд кодтой, хорз ӕмвӕзадыл цӕттӕдзинад сын кӕй ис.
Ирвӕзынгӕнӕн хайады минӕвар Марданты Дмитрий банысан кодта, зӕгъгӕ "кусджытӕ чысыл рӕдыдтытӕ ‘руагътой, фӕлӕ уыдон критикон не сты". Уый ма загъта, кусджытӕ се ‘ппӕт дӕр кӕй сты универсалон ӕмӕ бахъуыды рӕстӕджы кӕрӕдзи ивын сӕ бон у.