ЦХИНВАЛ, 2 окт — Sputnik, Хъотайты Мария. Цхинвалы скъола-интернаты футболон командӕ "Алантӕ" разынд иууыл ӕнтыстджындӕр музыкалон-спортивон фестивалы Мӕскуыйы, фехъусын кодта Sputnik ӕвзонг командӕйы тренер Тедеты Владимир.
Турниры архайдта дӕс командӕйы.
Финалы "Алантӕ" ныддӕрӕн кодтой Мӕскуы ӕмӕ Смоленскы командӕты ӕмӕ турниры кубок сӕхи бакодтой.
"Тунриры хуыздӕр хъазӕгыл нымад ӕрцыд Джиголаты Денис. Уый райста фыццаг къӕпхӕны диплом ӕмӕ зӕрдылдарӕн лӕвӕрттӕ", — банысан кодта Тедеты Владимир.
Йӕ ныхӕстӕм гӕсгӕ, сидзӕр сывӕллӕттӕн ацы стыр бӕрӕгбон арӕзт ӕрцыд спорты пропагандӕйы нысанӕн.
"Турнирмӕ хонӕн гӕххӕт куы райстам, уӕд сывӕллӕтты цинӕн кӕрон нал уыд. Райдайæны хайадисджытӕ дих ӕрцыдысты дыууӕ къордыл ӕмӕ ам дӕр "Алантӕ" цы командӕйы уыдысты, уый фыццаг бынат бацахста", — загъта тренер.
Турнир организацигонд ӕрцыд "Уӕрӕсейы Националон Олип"-ы Ӕхсӕнадон Оргкомитеты тыхтӕй футболон клуб ӔЦСК-ы стадионы. Спортивон ерыстӕй дарддӕр ма сывӕллӕттӕ хайад райстой конкурсты, концерты ӕмӕ хъӕзтыты.
