ЦХИНВАЛ, 2 окт — Sputnik, Козаты Диана. Ӕрбалӕугӕ азы райдайӕны горӕт Къуаисайы скъоладзаутӕ сӕ ахуыры процесс адарддӕр кӕндзысты, нырыккон домӕнтӕн дзуапп чи дӕтты, ахӕм агъуысты. Ног скъола арӕзт цӕуы Хуссар Ирыстоны социалон-экономикон райрӕзты Инвестицион нывӕзты фӕлгӕтты.
Скъолайы раздӕры бӕстыхай хъыгдард ӕрцыд 1991 азы зӕххӕнкъуысты рӕстӕджы ӕмӕ йын ӕркӕлынӕй тӕссаг кӕй уыд, уымӕ гӕсгӕ ахуыры процесс уагъд цыд вагонты. Зымӕгон рӕстӕг хатӕнты схъарм кӕнынӕн ӕндзӕрстой суг — уӕззау уавӕртӕ ӕндӕвтой ахуыры гъӕдыл дӕр.
Ныридӕгӕн дӕр сабитӕ ахуыр кӕнынц цалдӕр вагоны ӕмӕ Арӕнхъахъхъӕнджыты управленийы хайады бӕстыхайы.
"Ацафон дӕр Къуыдаргомы уазал у, уымӕ гӕсгӕ баиу кодтам электронон хъармгӕнӕнтӕ. Се ‘ппӕт дӕр иу куы вӕййынц, уӕд хызӕг нал фӕуромы тынгад. Компьютертӕ ӕмӕ ӕндӕр техникӕ ахицӕн вӕййынц", — дзуры ирон ӕвзаджы ахуыргӕнӕг Хуыгаты Альбина.
Къуаисайы скъолайы ахуыр кӕны 119 сывӕллоны. Ам фӕрсӕй-фӕрстӕм ахуыр кӕнынц уӕрӕсейаг арӕнхъахъхъӕнджыты кӕстӕртӕ ӕмӕ бынӕттон сывӕллӕттӕ.
Ахуыргӕнджытӕ хъаст кӕнынц, цы чингуытӕй хъуамӕ ахуыр кӕной, уыдон номхыгъд сӕм кӕй ӕрбафтыд фæстиатимӕ, уымӕ гӕсгӕ Ахуырады министрады ӕмӕ дуканиты ахуыргӕнӕн чингуытӕ ссарӕн нал ис.
Зындзинӕдтӕм ӕнӕкӕсгӕйӕ, коллектив архайы скъоладзаутӕн арф зонындзинӕдтӕ радтын ӕмӕ ахуыры процесс цымыдисон саразын. Уый сын ӕнтысгӕ дӕр кӕны. Ахуырдзаутӕ активонӕй архайынц олимпиадӕтӕ ӕмӕ ӕндӕр мадзӕлтты.
Дыккаг къласы ахуырдзау Хуыгаты Арсен ӕнӕрхъӕцӕй ӕнхъӕлмӕ кӕсы ног бӕстыхайы сцӕттӕмӕ. Фӕнды йӕ "барадхъахъхъӕнынадмимӕ йӕ фидӕн сбӕттын, цӕмӕй тох кӕна фыдгӕнджыты ныхмӕ".
Аразджытӕ ныфс дӕттынц, скъолайы бӕстыхай Ног азмӕ кӕй сцӕттӕ уыдзӕн. Нымад у 175 скъоладзауыл ӕмӕ фӕраздзӕн зӕххӕнкъуыстытӕн дӕр.
Прораб Замир Хамурзовы ныхӕстӕм гӕсгӕ, 10 октябры кусджытӕ бавналдзысты агъуыст ӕмбӕрзынмӕ ӕмӕ хӕрзарӕзтадон куыстытӕм.
"Объектыл кусы 50 аразӕджы, гӕнӕн уӕвгӕйӕ куыстмӕ фӕхонӕм бынӕттон цӕрджыты", — загъта прораб.
Уый ныфс бавӕрдта, Ног азмӕ скъоладзаутӕ ӕмӕ ахуыргӕнджытӕ кӕй райсдзысты зынаргъ лӕвар — ног скъола.
