Хуссар Ирыстоны равзæрстой хуыздæр бæгæныхсидæджы

© Sputnik / Ада БагианХуссар Ирыстоны равзæрстой хуыздæр бæгæныхсидæджы
Хуссар Ирыстоны равзæрстой  хуыздæр бæгæныхсидæджы - Sputnik Хуссар Ирыстон
Рафыссын
Ирон бæгæныйы фестиваль Хуссар Ирыстоны Ленингоры районы æрбамбырд кодта республикæйы хуыздæр бæгæныхсидджыты. Уæлахиздзауы æвзæрстой цыппар жюрийы уæнджы.

ЦХИНВАЛ, 7 окт — Sputnik, Козаты Дианæ. Ирон традицион бæгæныйы бæрæгбон арæзт æрцыд дыццæджы Хуссар Ирыстоны Ленингоры районы. Ам уагъд æрцыд ирон бæгæныйы дыккаг æхсæнадæмон фестиваль-конкурсы æвзæрстон этаптæй иу. Sputnik уацхæссæг фæуазæг ацы бæрæгбонмæ, аныхас кодта хайадисджытæ æмæ организатортимæ æмæ анызта бæгæныйæ дӕр.

Ирон бæгæныйы конкурс уагъд цæуы цалдæр азы. Ссис æхсæнадæмон, хайад дзы исынц бæгæныхсидджытæ æрмæст Ирыстонæй нæ, фæлæ ма Хъæрæсе-Балхъарæй дæр. Конкурс уагъд цæуы дыууæ этапæй. Фыццаг этапыл хуыздæр бæгæныхсидджыты равзардзысты республикæты алы районы дæр. Финалон хайы та, кæцы уагъд æрцæудзæн 29 октябры Дзæуджыхъæуы, æвзæрст æрцæудзæн уæлахиздзау.

Бæрæгбоны арæнтæ фæуæрæхдæр уыдзысты

"Ацы бæрæгбон æрмæст ирон националон бæгæныйы пропагандæ нæу, фæлæ ма нæ культурæ æмæ æгъдæутты пропагандæ. Фыдæлтæй нæм баззад, алкæцы ирон хæдзары дæр æнæ æртæ уæлибæх, бæгæныйы нуазæн æмæ скуывдæй иу фынг дæр нæ ацæуы. Ис нын тынг хæрзад æмæ рæсугъд къæбиц, уымæ гæсгæ ма цæуы националон хæринæгты пропагандæ дæр", — загъта Sputnik Адæмон культурæ æмæ этнотуризмы центр "Фарн"-ы (Цæгат Ирыстон) директор Цариты Валерий.

Йæ ныхæстæм гæсгæ, азæй азмæ фестиваль кæны популярондæр, æрбамбырд кæны бирæнымæц хайадисджытæ æмæ кæсджыты. Ацы аз организаторты фæндыд туркаг ирæтты дæр æрбахонын, фæлæ сын цавæрдæр аххосæгтæм гæсгæ нæ бантыст.

"Ацы аз нæ фестиваль фæндыд райдайын Турчы, не `мзæххонты æхсæн. Уыдис нын бадзырдтæ, фæлæ сын нæ бантыст рæстæгыл хи бацæттæ кæнын. Мæ хъуыдымæ гæсгæ нын иннæ аз алцыдæр рæстæгыл бантысдзæн саразын æмæ бæрæгбоны арæнтæ фæуæрæхдæр кæндзыстæм", — загъта Царийы фырт.

© Sputnik / Ада БагианИрон бæгæныйы фестиваль Хуссар Ирыстоны Ленингоры районы æрбамбырд кодта республикæйы хуыздæр бæгæныхсидджыты.
Фестиваль пива в Ленингорском районе - Sputnik Хуссар Ирыстон
Ирон бæгæныйы фестиваль Хуссар Ирыстоны Ленингоры районы æрбамбырд кодта республикæйы хуыздæр бæгæныхсидджыты.

Бæрæгбон æрæмбырд кодта хуыздæр бæгæныхсидджыты

Фестивалы æвзæрстон туры Хуссар Ирыстоны хайад райстой 13 конкурсанты. Бæгæныхсидыны сусæгдзинæдтæ æргом кодтой цалдæр специалисты республикæйы алы районтæй.

Знауыры районы Терегуаны хъæуы цæрæг Тъотъоты Зæлинæ фестивалмæ сцæттæ кодта дӕс литры бæгæны. Зӕлинӕ нын лӕмбынӕг радзырдта йӕ бӕгӕныйы рецепт. Йæ ныхæстæм гæсгæ, сæйраг уый нæу, æмæ конкурсы фæуæлахиз уа. Уый йæхи цæттæ кодта бæрæгбонмæ.

© SputnikИрон бӕгӕныйы рецепт
Ирон бӕгӕныйы рецепт - Sputnik Хуссар Ирыстон
Ирон бӕгӕныйы рецепт

Конкурсы хайадисджытæй иу — Уалыты Зоя æрцыд Ленингоры районы Цъинагары хъæуæй. Уый сæрыстырæй минас кæны бынаты йæхи арæзт дзыккайæ. Ивазы йæ алырдæм, уымæн ӕмӕ хорз арæзт дзыкка хъуамæ дзæбæх ивæза.

"Тынг æхсызгон мын уыд, бæрæгбон ацы аз махмæ кæй цæудзæн. Фарон Дзауы районы уагъд куы цыд, уæд дзы истон хайад. Фæлæ ныр куы базыдтон, фестивалы фысымтæ кæй стæм, уæд мæхи бацæттæ кодтон бæстондæрæй. Бузныг нæ цæгаттаг æфсымæртæн ацы бæрæгбоны тыххæй. 20 азы размæ хъуыды дæр нæ кодтам, цард афтæ кæй фæзилдзæн, æмæ цæрдзыстæм сабырдзинады, нæ район размæ кæй цæудзæн. Стыр Хуыцау нын алыхаттдæр æххуысгæнæг уæт æмæ Ирыстон кæддæриддæр дидин æфтауæд", — загъта Уалыты Зоя.

12 сылгоймаджы æхсæн уыд иунæг нæлгоймаг-конкурсант — Козаты Олег Цхинвалы районы Зары хъæуæй. Дзуры, æцæг ирон бæгæны задæй кæй цæттæ кодта йæ нанайы рецептмæ гæсгæ æмæ æрмæст тæфæй дæр сбæрæг кæндзæн, цæмæй арæзтой бæгæны иннæ хайадисджытæ.

© Sputnik / Ада Багиан12 сылгоймаджы æхсæн уыд иунæг нæлгоймаг-конкурсант - Козаты Олег Цхинвалы районы Зары хъæуæй.
Фестиваль пива в Ленингорском районе - Sputnik Хуссар Ирыстон
12 сылгоймаджы æхсæн уыд иунæг нæлгоймаг-конкурсант - Козаты Олег Цхинвалы районы Зары хъæуæй.

Алы хайадисæджы фынгыл дæр бæгæныйы нуазæнæй дарддæр уыд æртæ уæлибæхы, фых дзидза, хæдзарон арахъхъ, дзыкка, сой, къæдор, цыхт, бынæттон дыргътæ æмæ халсартæ. Алкæмæн дæр уыд алы хæринагæй дæр ацаходыны фадат.

© Sputnik / Ада БагианАлкæмæн дæр уыд алы хæринагæй дæр ацаходыны фадат.
Фестиваль пива в Ленингорском районе - Sputnik Хуссар Ирыстон
Алкæмæн дæр уыд алы хæринагæй дæр ацаходыны фадат.

Алкæйдæр фæнды рамбулын

Хайадисджыты фарс балæууыдысты администрациты сæргълæуджытæ дæр. Ленингоры районы сæргълæууæг Босыкты Алексейы ныхæстæм гæсгæ, адæм зæрдиагæй сæхи цæттæ кодтой бæрæгбонмæ, цин кодтой.

"Махæн ацы мадзал уыд æцæг бæрæгбон. Ахæм хъуыддæгтæ иу кæнынц адæмы, иу кæнынц Ирыстоны. Мах хъуамæ фæуæлахиз уæм, æндæр гæнæн нæй", — загъта уый.

Дзауы районы сæргълæууæг Чилæхсаты Владимиры дæр ныфс ис, жюрийы уæнгтæ кæй равзардзысты аккагдæры.

"Бакæсут ма, куыд хъæздыг æвæрд сты нæ фынгтæ. Адæм зонгæ кæнынц, кæрæдзийыл цин кæнынц. Фæнды нæ, цæмæй бæрæгбон иннæ аз ацæуа Дзауы районы. Абон та хъуамæ нæ къухты бафта уæлахиз", — загъта Чилæхсаты Владимир.

Аргъ лæвæрд цæуы регламентмæ гæсгæ

Конкурсы хайадисджыты куыстæн аргъ кодтой жюрийы цыппар уæнджы — компани "Бавария"-йæ дыууæ технологы æмæ бæгæныйы дыууæ бынæттон дæсныйы, кæцыты раразмæ кодтой конкурсы организатортæ. Эксперименты æргомдзинады сæраппонд иу бæгæныйы бæрцуат нывæрдтой сæрмагонд сау тыхтонты æмæ сын лæвæрд цыд сæрмагонд номыртӕ. Дегустацийы фæстæ жюрийы уæнгтæ сæрмагонд сыфтыл æвæрдтой нысæнттæ æмæ алы хуызæгæн дæр аргъ кодтой 1 баллæй 5 баллы онг.

© Sputnik / Ада БагианКонкурсы хайадисджыты куыстæн аргъ кодтой жюрийы цыппар уæнджы.
Фестиваль пива в Ленингорском районе - Sputnik Хуссар Ирыстон
Конкурсы хайадисджыты куыстæн аргъ кодтой жюрийы цыппар уæнджы.

Жюрийы сæргълæууæг Дидарты Георгий Sputnik куыд загъта, афтæмæй уал бæгæныйæн фыццаг хъуамæ уа раст температурæ — 8 градусæй 12 градусы онг. Аргъ цæуы бæгæныйы хуызæн, фынкæн, тæфæн, адæн.

Лæмбынæг æвзæрст æмæ дегустацийы фæстæ жюри цæттæ уыд уæлахиздзауы ном фехъусын кæнынмӕ. Уæлахиздзауы ном фехъусын кæныны размæ фестивалы хайадисджытæ æмæ уазджытæн равдыстой культурон программæ — бынæттон артисттæ æмæ цæгатирыстойнаг зарæггæнджытæ æмæ кафджытæ равдыстой сæ арæхстдзинад сценӕйыл.

Фæуæлахиз Дзауы районы цæрæг

Конкурсы хайадисджытæй алкæмæн дæр лæвæрд æрцыдысты дипломтæ æмæ зæрдылдарæн лæвæрттæ. Дыккаг æмæ æртыккаг бынæттæ бацахстой Цхинвалы районы цæрджытæ Хъæцмæзты Зæлинæ æмæ Джиголаты Заремæ. Уыдонæн лæвæрд æрцыдысты æхцайы фæрæзтæ — 10 æмæ 5 мин сомы.

Уæлахиз бафтыд фестивалы иууыл æрыгондæр хайадисæг — Дзауы районы Кърозы хъæуы цæрæг, 35-аздзыд Дыгъуызты Ульянæйы къухты. Уымæн лæвæрд æрцыд 15 мин сомы æмæ фестивалы финалы хайад райсыны фадат, кæцы уагъд æрцæудзæн Цæгат Ирыстоны октябры кæрон.

Дыгъуызты Ульянæ бæгæны фыццаг хатт бахсыста дыууæ азы размæ. Бацамыдта йын æй йæ мад. Бæгæны фыцы æрмæстдæр задæй. Уый ныфс ис, йæ нозтæн ын финалы дæр æмбæлон аргъ кæй скæндзысты, æмæ ахæм бæрæгбæттæ кæй цæудзысты арæхдæр.

"Чи фæуæлахиз, уый ахæм ахсджиаг нæу. Мах фыццаджыдæр цин кæнæм бæрæгбоныл, уыйбæрц адæм дзы хайад кæй райстой", — загъта уый Sputnik уацхæссæгæн.

Ирон бæгæныйы фестивалы организатортæ сты Цæгат Ирыстоны культурæ æмæ массон коммуникациты министрад, традицион культурæ æмæ этнотуризмы республикон центр "Фарн" (Цæгат Ирыстон). Генералон спонсор та у бæгæныфыцæн хæдзар "Бавария".

Ног хабӕртты лентӕ
0