ЦХИНВАЛ, 8 окт — Sputnik. Дыууӕ ирон богал Рӕмонты Сослан ӕмӕ Байцаты Владислав ссисты уӕгъдибар хъӕбысхӕстӕй Дунейон ӕфсӕддон ерысты уӕлахиздзаутӕ, хъусын кӕны 15 регион.
Ерыстӕ цӕуынц Хуссар Кореяйы горӕт Мунгенейы. Ирон спортсментӕ фондзӕй дунеон ерысты архайдтой Уӕрӕсейы ӕмбырдгонд командӕйы сконды. Ирон богалтӕй фӕхӕрд ис ӕрмӕстдӕр иу, аннӕ цыппар сты уӕлахиздзаутӕ.
"Финалы 70 килограммы уӕзы категорийы архайгӕйӕ Рӕмонты Сослан ныддӕрӕн кодта азербайджанаг спортсмен Джошгун Азимовы ӕмӕ ссис ерысты уӕлахиздзау. Байцаты Владислав та архайдта 125 килограммы уӕзы ӕмӕ финалы фӕуӕлхиз ис китайаг Ден Живэйыл", — дзырдӕуы хъусинаджы.
VI-ӕм дунейон ӕфсӕддон ерысты уӕгъдибар хъӕбысхӕстӕй Уӕрӕсейы спортивон кад хъахъхъӕдтой Рӕмонты Сослан, Гацалты Хаджимурӕт, Тускъаты Азӕмӕт, Байцаты Владислав ӕмӕ Цӕболты Хетӕг. Ерыстӕ уагъд цӕудзысты 13 октябрмӕ.
