ЦХИНВАЛ, 15 окт — Sputnik. Æфсæддон æмæ паддзахадон архайæг Цæголты Кимы цыппӕрӕмы афӕндараст кодтой йе ‘нусон бынатмӕ, инæлар-майоры бавӕрдтой Мӕскуыйы Троекуроваг уӕлмӕрды, хъусын кӕны Хуссар Ирыстоны минӕварад Уӕрӕсейы Федерацийы.
Инæлар-майор Цæголты Ким йæ цардæй ахицæн 86-аздзыдæй Мæскуыйы къуырисæры. Йӕ амӕлӕты фӕдыл тӕфӕрфӕсы тел арвыста РХИ президент Тыбылты Леонид.
"Цæголты Кимӕн хӕрзбон зӕгъынмӕ ӕрбацыдысты Уӕрӕсейы уӕвӕг Хуссар Ирыстоны минӕварады кусджытӕ, Паддзахадон Думӕйы депутаттӕ, ӕхсӕнадон ӕмӕ политикон архайджытӕ, ирон диаспорӕйы уӕнгтӕ, афтӕ ма йӕ чи зыдта ӕмӕ йын чи кад кодта, уыдон", — дзырдӕуы хъусинаджы.
1980-æм азты кæрæтты Цæголты Ким хайад иста Хуссар Ирыстоны Звиад Гамсахурдиайы хотыхджын къордты бабырстæй хъахъхъæнынады хъуыддаджы. 2000-æм азæй июлы Цæголты Ким куыста Уæрæсейы президенты æххæстбарджын минæварæй Хуссар Федералон зылды. Цæголты Ким у философон наукæты доктор. У бирæ нывты автор, архайдта бирæ аивадон равдыстыты. Хорзæхджын у Советон Цæдисы, Уæрæсейы, Афганистаны, Польшæйы кады нысæнттæй.
