ЦХИНВАЛ, 16 окт — Sputnik. Хуссарирыстойнаг боксер Козаты Асланбек ауадздзӕн Лас-Вегасы (АИШ) дыууӕ тохы, фехъусын кодта Sputnik спортсмены тренер Сланты Виталий.
27-аздзыд Козаты Асланбек профессионалон рингмӕ рахызт 2008 азы. У WBC версийы Европӕйы чемпион, фӕсивӕды ӕхсӕн дунейы ӕхсӕнконтиненталон чемпионы титулы хицау, Азийы чемпион.
"Аслан стох кӕндзӕн 6 ноябры Лас-Вегасы украинӕйаг Тарас Шелестюкимӕ. Тох уагъд цӕудзӕн дунейы ӕхсӕнконтиненталон чемпионы титулы сӕраппонд Ӕппӕтдунейон боксерон ассоциаци WBA версийы ӕмӕ Цӕгат Америчы чемпионы титулы сӕраппонд", — загъта Сланты Виталий.
Тренеры ныхӕстӕм гӕсгӕ, Козайы фыртӕн ис фидар ӕмӕ тӕссаг ныхмӕлӕууӕг, Олимпиаг хъӕзтыты бронзӕйон призер украинаг Тарас Шелестюк. Уый фӕуӕлахиз йӕ 12 тохӕй алкӕцыйы дӕр, фараст тохы та йӕ ныхмӕлӕуджыты рамбылдта нокаутӕй.
Козаты Аслан йӕхӕдӕг фӕстаг хатт рингмӕ рахызт фарон фӕззӕджы.
"Аслан иу азӕй фылдӕр нӕ рахызт рингмӕ, фӕлӕ, уымӕ ӕнӕкӕсгӕйӕ, ис иттӕг хорз физикон формӕйы. Ацы тох ын у тынг ахсджиаг, уый ын фадат ратдзӕн дунейон боксы элитӕмӕ бахизын", — загъта тренер.
Козаты Асланбек ауагъта 28 тохы, уыдонӕй фӕуӕлахиз 26 хатты, иу хатт фембылд, иу хатт та тох ахицӕн ӕмдыхӕй.
