ЦХИНВАЛ, 16 окт — Sputnik. Фӕстаг ӕртӕ боны дӕргъы арӕнхъахъхъӕнджытӕ Хуссар Ирыстоны ӕрцахстой Гуырдзыстоны цыппар ӕмбӕстаджы, кӕцытӕ ӕнӕзакъонӕй ӕрбахызтысты арӕны сӕрты, фехъусын кодтой Sputnik Паддзахадон ӕдасдзинады комитеты (ПӔК) пресс-службӕйы.
"Ленингоры районы Цъинагары хъӕуы паддзахадон арӕны фадыджы 13 октябры арӕнхъахъхъӕнджытӕ ӕрцахстой 39-аздзыд Гуры районы цӕрӕджы. 15 октябры та Знауыры районы Чъорбаулийы хъӕуы арӕнгӕрон территорийыл ӕрцахстӕуыд Карелы районы цӕрджыты дыууӕйӕ", — радзырдта пресс-службӕйы минӕвар.
ПӔК-ы ма куыд банысан кодтой, афтӕмӕй арӕны сӕрты хизыны фӕтк фехалыны цауты лӕмбынӕг басгӕрсты фӕстӕ ӕрмӕджытӕ ӕрвыст ӕрцӕудзысты тӕрхондонмӕ.
Уымӕй дарддӕр ма, 14 октябры оперативон-сгарӕн мадзӕлтты фӕлгӕтты Цхинвалы районы Серы хъӕуы арӕнхъахъхъӕнджытӕ ӕрцахстой ноджы иу Гуырдзыстоны ӕмбӕстаджы — Марнеулы районы 17-аздзыд цӕрӕджы. Куыд рабӕрӕг, афтӕмӕй уый паддзахадон арӕн фехӕлдта ныр дыккаг хатт.
Ацы цауы фӕдыл ӕппӕт ӕрмӕджытӕ дӕр ныридӕгӕн арвыстӕуыд тӕрхондонмӕ.
