ЦХИНВАЛ, 19 окт — Sputnik. Ӕппӕтадӕмон сфысты райдайӕнӕй фӕстӕмӕ Хуссар Ирыстоны сфыстуадзджытӕ аххӕссыдысты фондз мин хӕдзарыл ӕмӕ 16 мин адӕймагыл, фехъусын кодта Статуправленийы сӕрдар Тыбылты Инал.
Хуссар Ирыстоны 15 октябры райдыдта бӕстӕйы ног историйы фыццаг ӕппӕтадӕмон сфыст. Сӕйраг куыст фӕуыдзӕн 30 октябрмӕ. Сфысты фыццаг хайад райста президент Тыбылты Леонид.
"Ӕппӕт республикӕйы сфыстуадзджытӕн цыппар бонмӕ бантыст райсын бӕрӕггӕнӕнтӕ 4 928 хӕдзар ӕмӕ 16 278 адӕймаджы фӕдыл", — загъта Тыбылты Инал.
Йӕ ныхӕстӕм гӕсгӕ, мадзал цӕуы ӕнӕ фӕткхалӕн цаутӕй, статуправленийы кусджытӕ ӕрвыл бон дӕр сфыстмӕ сӕ хъус дарынц.
