ЦХИНВАЛ, 21 окт — Sputnik. Цхинвалы Колыты Аксойы номыл аивӕдты лицейы ахуырдзауты куыстытӕ бацахстой призон бынӕттӕ Ӕхсӕнрегионалон Фестиваль-форум "Диалог культур"-ы, фехъусын кодта Sputnik ахуырадон уагдоны директор Кӕсойты Лаврентий.
Дзӕуджыхъӕуы Аивӕдты республикон лицейы ӕртыццӕджы йӕ дуӕрттӕ ӕрбакодта сывӕллӕтты аивадон сфӕлдыстады фестиваль-форум "Диалог культур". Мадзалмӕ, Кавказы иннӕ республикӕты минӕвӕртты ӕмрӕнхъ, 25 куысты бавдыстой хуссарирыстойнаг ӕвзонг нывгӕнджытӕ дӕр.
Лицейы хъомылгӕнинӕгтӕй дарддӕр ма мадзалы хайад райстой Хуссар Ирыстоны Сывӕллӕтты сфӕлдыстадон галуаны ахуырдзаутӕ.
"Фестивалы нӕ ахуырдзаутӕй дыууӕйы куыстытӕ бацахстой дыккаг бынӕттӕ, ӕртӕ ӕвзонг нывгӕнӕджы къухы та бафтыд дипломтӕ. Хорзӕх кӕныны церемони ацӕудзӕн боны дыккаг ӕмбисы", — загъта Кӕсойты Лаврентий.
Ивгъуыд ӕзты дӕр-иу хуссарирыстойнаг скъоладзаутӕ ӕрӕздӕхтысты "Диалог культур"-ӕй хорз ӕнтыстытимӕ. 2014 азы Цхинвалы сывӕллӕтты нывгӕнӕн скъолайы ахуырдзау райста фыццаг бынат графикӕйы жанры.
Фестиваль-форум цӕуы УФ культурӕйы министрады ӕххуысӕй. Ацы аз мадзалы архайынц нывгӕнӕн ахуырадон уагдӕтты ирддӕр минӕвӕрттӕ Мӕскуы, Дагъыстан, Кӕсӕг-Балхъар, Хъӕрӕсе-Черкеси, Хуссар ӕмӕ Цӕгат Ирыстонӕй.
