ЦХИНВАЛ, 26 окт — Sputnik. Стыр театры балетон къорды ног къухдариуæггæнæгæй нысан æрцыд Ла Скала-йы балетмейстер, Цæгат Ирыстонæй рацæугæ Уазиты Махар. Ног директор кусдзæн театры ныры командæимæ.
Ивгъуыд сезоны кæрон куыд рабæрæг, афтæмæй балетмейстер Сергей Филинимæ контракт нæ адарддæр кæндзысты, 2016 азы мартæй та аивадон къухдариуæггæнæджы бынат æрцæудзæн æхгæд: уый бæсты Паддзахадон академион стыр театры уыдзæн балеты директоры бынат. Стыр театры балетон къорды ног къухдариуæггæнæгæй нысан æрцыд Уазиты Махарбег, зындгонд артист æмæ хореограф, кæцы лæууыд "Ла Скала" æмæ Мариинаг театрты сæргъ.
Уазийы фырты къуырисæры коллективæн базонгæ кодта Стыр театры генералон директор Владимир Урин.
"Стыр театрмæ кусынмæ куы цæуай, уæд хъуамæ хынцай ацы театры чи кусы, уыдонимæ кусыны фæндон. Нæ хъуыды кæнын, абоны балетон кампанийы фæлгæтты кæй ис ахæм адæм, кæцытимæ мæ бон нæ уаид бакусын", — загъта Уазийы фырт журналисттæн.
Уый банысан кодта, нырма раджы кæй у труппæимæ куысты фæдыл конкретон нывæзттыл дзурын.
Владимир Урин куыд загъта, афтæмæй Махарбег йæ куыстмæ æрæвналдзæн, Филинимæ контракты кæроны фæстæ — 2016 азы апрелы. Уый æмрæстæджы Филинимæ æртæрхон кæндзысты театры йæ дарддæры куысты тыххæй.
Уазиты Махарбег (Махар) Хасаны фырт райгуырд 1961 азы 16 июны, Цæгат Ирыстоны горӕт Алагиры.
1973 азы бацыд Ленинграды хореографион ахуыргæнæндонмæ (ныры Уæрæсейаг балеты академи), каст æй фæци 1981 азы.
1979 азы йæ айстой Кировы номыл Ленинграды оперæ æмæ балеты театрмæ (ныры Мариинаг театр). 1986 азы райдыдта æххæст кæнын фыццаг партитæ, 1989 азы ссис театры премьер.
1995-2008 азты куыста Мариинаг театры балетон къорды къухдариуæггæнæгæй.
2008 азы ныууагъта йæ пост, Италимæ кæй ацыд, уый тыххæй.
2009 азы 1 январы ссис Миланы театр "Ла Скала"-йы балетон къорды къухдариуæггæнæг.
Уазиты Махарбег у УФ-йы сгуыхт артист (2002).
Ис ын цардæмбал, чызг. Йе `мкъай Ольга Ченчикова раздæр уыд Мариинаг театры прима-балерина, у УФ-йы Адæмон артисткæ, ахуыргæнæг-репетитор.
