ЦХИНВАЛ, 29 окт — Sputnik. Хуссар Ирыстоны Паддзахадон автоинспекции райдыдта ивар кæнын скъæрджыты змæлды ныхмæ парковкæйы тыххæй, фехъусын кодта цыппæрæмы Sputnik Фæндагон змæлды æдасдзинады паддзахадон инспекцийы управленийы минæвар Уалыты Альмæ.
Йæ ныхæстæм гæсгæ, ныры закъонмæ гæсгæ уагæвæрдхалæг урæды тыххæй мадзæлттæ ист цæуынц рагæй, фæлæ фæстаг рæстæджы ФЗÆПИУ-йы инспектортæ уæлдай хъусдард здахынц змæлды ныхмæ урæд автотранспортмæ.
"Уый æвзæрын кæны аварион уавæр, уымæн æмæ машинæ æвиппайды рахизы ныхмæдзог хахмæ", — загъта Уалыты Альмæ.
Уый загъта, ахæм фæткхалӕн цауы фæстиуæгæн автотранспорты хицауæн байст кæй æрцæуынц йæ скъæрæджы бартæ æмæ паддзахадон номыртæ.
Кæд æмæ фæткхалæг уыцы рæстæджы бынаты нæ разына, уæд ын инспектортæ рафтауынц йæ номыртæ æмæ ныууадзынц фыстæг, чи æмæ сæ цæй тыххæй рафтыдта.
Скъæрæджы бартæ æмæ номыртæ фæстæмæ раздахыны тыххæй, машинæйы хицау хъуамæ бафида ивар банчы, науæд ын йæ скъæрæджы бартæ байсдзысты цыппар мæйы æмгъуыдмæ.