ЦХИНВАЛ, 3 ноя — Sputnik. Хуссар Ирыстоны цæрджыты иумæйаг сфысты бындурон фазæ ацыд æнæ фæткхалӕн цаутæй. Развæлгъау бæрæггæнæнтæм гæсгæ, сфыст æрцыдысты республикæйы 51 мин цæрæджы æмæ 16 мин хæдзары, фехъусын кодта дыццæджы журналисттæн Тыбылты Инал.
Иумӕйаг сфыст уагъд æрцыд Хуссар Ирыстоны 15-30 октябры фыццаг хатт дыууын фондз азы мидæг. Йӕ ауадзыны хъуыддаджы РХИ-йы Статуправленийæн баххуыс кодтой уæрæсейаг коллегæтæ.
"Бындурон фазæ кæронмæ бахæццæ, фæлæ дарддæр цæуы контролон æрзылд, цæмæй сфыссæм республикæйы цæрджыты, кӕцыты сфыстуадзджытæ хæдзары нæ баййæфтой. Ныридæгæн нæм цы бæрæггæнæнтæ ис, уыдонмæ гæсгæ сфыст æрцыдысты Хуссар Ирыстоны 51 мин цæрæгæй фылдæр", — загъта Статуправленийы сæргълæууæг.
Тыбылты Инал банысан кодта, уыцы 51 мин адæймагæй 30 мин кæй сты горæты цæрджытæ, иннæтæ та республикæйы районты цæрджытæ.
Статуправленийы сæргълæууæг бафтыдта, дырысдæр бæрæггæнæнтыл дзурыны фадат кæй уыдзæн дыууæ мæйы фæстæ, сфысты гæххæттытæ иууылдæр нымад куы æрцæуой, уӕд.
"Бакæнын хъæуы бæстон куыст, фæлæ сараздзыстæм æппæтдæр, цæмæй ацы куыст бакæнæм, куыд гæнæн уа, афтæ тагъддæр", — банысан кодта Тыбылты Леонид.
Сфысты хатдзæгон бæрæггæнæнтæ бæрæг уыдзысты 2016 азы æмбисы. Фæстиуджытæ мыхуыр æрцæудзысты хицæн æмбырдгондæй, уымæй дарддæр ма бæрæггæнæнтæ æвæрд уыдзысты Статуправленийы сайтыл.
Хуссар Ирыстоны цӕрджыты сфыст фӕстаг хатт уагъд ӕрцыд 1989 азы. Республикӕйы цӕрджыты нымӕц уӕд уыд 98,5 мин адӕймаг. Уыдонӕй 65 минӕй фылдӕр ирӕттӕ, 28 мин гуырдзиӕгтӕ, дыууӕ мин уырыссӕгтӕ. Иннӕтӕ — дзуттаг, сомихаг ӕмӕ ӕндӕр нациты минӕвӕрттӕ.
