ЦХИНВАЛ, 4 ноя — Sputnik. Ирыстоны хъайтар Козаты Левы номарæн республикон турнир мини-футболæй райдыдта Цхинвалы.
Скъолайон командæты æхсæн турнир уагъд цæуы фæндзæм хатт æхсæнадон организаци "ЗИУ"-ы хъæппæрисæй. Спортивон мадзал нывонд у Ирыстоны хъайтар Козаты Левæн, кæцы фæмард 2008 азы августы Гуырдзыйы агрессийы рæстæджы.
Ацы аз турниры хайад исы 11 скъолайон командæйы — дæс Цхинвалæй, иу та Дзауы поселокæй.
"Стыр бузныг стæм турниры организатортæ æмæ хайадисджытæй, кæй нæ рох кæнынц Левы æмæ ӕндӕр лæппуты, кæцытæ сæ цард радтой хæдбар Ирыстоны сæрвæлтау", — загъта турнир бакæныны церемонийы рæстæджы Козаты Левы фыды æфсымæр Вячеслав.
Ерысты хайадисджытæн республикæйы хицауады вице-премьер Пухаты Эрикы цæст бауарзта стыр æнтыстытæ.
Æрæмбырдуæвджытæ иу уысм æдзæмæй алæууыдысты, йæ райгуырæн зæххы тыххæй йæ цард чи радта, уыцы фыдыбæстæ хъахъхъæнджыты рухс ном арынæн.
Ерыстæ адарддæр уыдзысты 17 ноябры онг. Уæлахиздзаутæ æмæ призертæм æнхъæлмæ кæсынц кубоктæ, цытджын грамотæтæ æмæ зæрдылдарæн лæвæрттæ.
Турнир уагъд цæуы фӕсивӕдон политикӕ, спорт ӕмӕ туризмы комитет, æхсӕнадон организаци "ЗИУ", ахуырад ӕмӕ хъахъхъӕнынады министрӕдты ӕмархадӕй.
