ЦХИНВАЛ, 5 ноя — Sputnik. Цхинвалы ацӕудзӕн Ирыстоны хъайтар, РХИ хъахъхъӕнынады фыццаг министр Хуыбылты Валерийы номарӕн гом турнир боксӕй, фехъусын кодтой Sputnik фӕсивӕдон политикӕ, спорт ӕмӕ туризмы комитеты пресс-службӕйы.
Боксы турнир цӕудзӕн 7-8 ноябры Цхинвалы спортивон скъолайы бӕстыхайы. Ам сӕ цӕттӕдзинад фӕлвардзысты 1998-1999, 2000-2001, 2002-2003 ӕзты гуырд спортсментӕ.
"Турнир цӕудзӕн боксы Ӕхсӕнадӕмон федерацийы (AIBA) фӕткмӕ гӕсгӕ. 6-ӕм ноябры сбӕрӕг кӕндзысты спортсментӕн сӕ уӕз ӕмӕ дыккаг бон райдайдзӕн турнир", — банысан кодта комитеты пресс-секретарь.
Фӕсивӕды ӕхсӕн гом турнир уагъд цӕуы хъахъхъӕнынады фыццаг министр, Ирыстон ӕмӕ Абхазы хъайтар Хуыбылты Валерийы рухс номыл. Организацигонд цӕуы фӕсивӕдон политикӕ, спорт ӕмӕ туризмы комитеты тыхтӕй ахуырады министрады ӕмархайдӕй.
