ЦХИНВАЛ, 6 ноя — Sputnik. Зынгӕ ирон нывгӕнӕг Харебаты Валаны куыстытӕн Цхинвалы майрӕмбоны байгом равдыст, экспозицийы ис 50 нывы онг графикӕ ӕмӕ хуызфысты здӕхӕнты, хъусын кӕны Sputnik уацхӕссӕг.
Мадзалмӕ ӕрӕмбырд сты аивады фадыджы зынгӕ архайджытӕ Хуссар ӕмӕ Цӕгат Ирыстонӕй, РХИ хицауады уӕнгтӕ ӕмӕ нывгӕнӕджы сфӕлдыстадӕн табугӕнджытӕ.
"Хуыцау курдиӕттӕ куы уӕрста, уӕд дзы Харебаты бинонтӕм хорз фӕкаст", — банысан кодта хицауады сӕрдар Хъуылмбегты Доменти.
Харебаты Валаны куыстытӕн Цхинвалы равдыст органзацигонд ӕрцыд фыццаг хатт, адӕмы размӕ цы нывтӕ рахаста, уыдон, йӕ ныхӕстӕм гӕсгӕ, ныффыста йе ‘взонджы бонты.
"Ацы нывтӕ иууылдӕр фыст ӕрцыдысты ивгъуыд ӕнусы 50-60 азты, Хуссар Ирыстоны ма куы цардтӕн, уӕд. Мӕ райгуырӕн зӕххыл мын нырма равдыст никуы уыд ӕмӕ мын уӕлдай ӕхсызгон у уый тыххӕй абоны мадзал", — банысан кодта Харебаты Валан.
Равдыст конд ӕрцыд ПККЗ "Чермен"-ы, юбилейон мадзал адарддӕр кодтой Харебаты ӕртӕ ӕфсымӕры сӕ иумӕйаг концертӕй. Дыууӕ мадзал дӕр организацигонд ӕрцыдысты культурӕйы министрады тыхтӕй.
Харебаты Валан у Советон Цӕдисы ӕмӕ Цӕгат Ирыстоны сгуыхт нывгӕнӕг, Уӕрӕсейы нывгӕнджыты цӕдисы уӕнг. У хӕдахуыр нывгӕнӕг, йӕ куыстытӕ хайад исынц алыгъуызон уӕрӕсейаг ӕмӕ ӕхсӕнадӕмон равдыстты.
