ЦХИНВАЛ, 10 ноя — Sputnik. Тӕбӕхсӕуты Балойы номыл Цӕгат Ирыстоны паддзахадон академион театр ӕрцыд гастролты Цхинвалмӕ. Ӕртӕ боны дӕргъы труппӕ равдисдзӕн цалдӕр спектаклы хуссарирыстойнаг театруарзджытӕн, фехъусын кодта Sputnik Цӕгат Ирыстоны театры директоры хӕдивӕг Мӕргъиты Аза.
Цӕгатирыстойнаг артисттӕ сӕ гастролты рӕстӕджы равдисдзысты сывӕллӕттӕн аргъау "Теремок", лирикон комеди "Сӕлдӕг" ӕмӕ драмон таурӕгъ "Фыдӕлты къона".
"Фӕндыд нӕ бахъӕлдзӕг кӕнын театрмӕ кӕсджыты зӕрдӕтӕ ӕмӕ ӕрхастам лирикон комеди "Сӕлдӕг". Ам ӕвдыст цӕуы рагзамантӕй абоны цардмӕ адӕймаг куыд ӕрбахуад, уый. Ӕнӕхъусдард нӕ ныууагътам нӕ чысыл хурты дӕр ӕмӕ дыццӕджы дыууӕ хатт равдисдзыстӕм сывӕллӕттӕн ирон ӕвзагмӕ тӕлмацӕй уырыссаг аргъау "Теремок". Гастролтӕ ӕхӕгӕд ӕрцӕудзысты драмон таурӕгъ "Фыдӕлты къона"-йӕ", — радзырдта Мӕргъиты Аза.
Уый ма банысан кодта, Хуссар Ирыстонмӕ Дзӕуджыхъӕуы академион театр кӕй ласы спектаклтӕ ныр 40 азы дӕргъы, фӕстӕдӕр та ӕнхъӕлмӕ кӕсынц Хуссар Ирыстоны театры гастролтӕм сӕхимӕ.
Тӕбӕхсӕуты Балойы номыл Цӕгат Ирыстоны паддзахадон академион театр Цхинвалы равдисдзӕн спектаклтӕ 10,11 ӕмӕ 12 ноябры.
