ЦХИНВАЛ, 12 ноя — Sputnik. Хетӕгкаты Къостайы номыл Хуссар Ирыстоны паддзахадон драмон театр бавдисдзӕн Цӕгат Кавказы националон театрты VII ӕхсӕнадӕмон фестиваль "Сцена без границ"-мӕ спектакль "Ныййарӕджы кадӕг", фехъусын кодта Sputnik театры аивадон къухдариуӕггӕнӕг ӕмӕ директор Къацты Филипп.
Гаглойты Владимиры пьесӕ "Ныййарӕджы кадӕг"-мӕ гӕсгӕ спектакль Хуссар Ирыстоны сценӕйыл сӕвӕрдта режиссер Дзуццаты Тамерлан. Спектаклы ӕвдыст цӕуы Стыр Фыдыбӕстӕйон хӕсты рӕстӕджы ирон бинонты трагикъон хъысмӕт — ныййарӕгӕн йӕ авд фырты хӕсты бындырӕй нал ӕрыздӕхтысты. Пьесӕйы зӕрдиагӕй райстой Хуссар Ирыстоны театруарзджытӕ, ныр та йӕ бавдисдзысты фестивалмӕ.
"Спектакль равдисдзыстӕм 21 ноябры Тӕбӕхсӕуты Балойы номыл Цӕгат Ирыстоны паддзахадон академион театры сценӕйыл, цыран уагъд цӕудзӕн фестиваль. Уагӕвӕрдмӕ гӕсгӕ, мадзалы хорзӕхтӕ лӕвӕрд цӕудзысты ӕхсӕз номинацийы — хуыздӕр спектакль, хуыздӕр нӕлгоймаг ӕмӕ сылгоймаджы фӕлгонцтӕ, хуыздӕр режиссура ӕмӕ ӕндӕртӕ", — радзырдта театры директор.
Цӕгат Кавказы националон театрты VII ӕхсӕнадӕмон фестиваль "Сцена без границ" цӕудзӕн 21-25 ноябры Дзӕуджыхъӕуы Ирон театры бӕстыхайы. 2002 азы Дзуццаты Тамерланӕн йӕ иннӕ куыст — Брытъиаты Елбыздыхъойы пьесӕмӕ гӕсгӕ ӕвӕрд спектакль "Амран" райста фестиваль "Сцена без границ"-ы хорзӕх номинаци "Хуыздӕр режиссура"-йы.
