ЦХИНВАЛ, 13 ноя — Sputnik. Уырыссаг культӕрӕ, истори ӕмӕ традицитӕ рапарахат кӕныны нысанӕн Россотрудничество газет "Комсомольская правда"-имӕ иумӕ Хуссар Ирыстоны расидт конкурс "Россия: пять причин моей симпатии", фехъусын кодтой Sputnik Россотрудничествойы минӕварады пресс-службӕйы.
Конкурс уагъд цӕуы Россотрудничествойыл 90 азы юбилейон мадзӕлтты фӕлгӕтты. Конкурсы хайадисӕг суӕвынӕн хъӕуы "Комсомольской правда"-йы электронон адресыл къамтӕ ӕмӕ чысыл уац арвитын, кӕцытӕ дзурӕг сты, адӕмон дипломати хицӕн бӕстӕты куыд иу кӕны, ууыл.
"Конкурсы уӕлахиздзаутӕн арӕзт ӕрцӕудзӕн балц Мӕскуыйы цӕуӕг адӕмон дипломатийы форуммӕ 26-27 ноябры, уымӕй дарддӕр ма сын уыдзӕн экскурситӕ Уӕрӕсейы фенддаг бынӕттӕм, стӕй ма сӕм ӕнхъӕлмӕ кӕсы лӕвӕрттӕ Россотрудничество ӕмӕ "Комсомольская правда"-йӕ", — загъта минӕварады кусӕг.
Конкурсы хайадисӕг суӕвынӕн фадат ис 25 — 35 азы кары алкӕцы адӕймагӕн дӕр, кӕцытӕ активонӕй архайынц республикӕйы политикон, зонадон, ӕхсӕнадон ӕмӕ культурон фадгуыты.
Конкурс цӕуы Хӕдбар паддзахадты цӕдисы бӕстӕты дӕр.
