ЦХИНВАЛ, 17 ноя — Sputnik. Хуссарирыстойнаг адӕмон кафты ансамбль "Амонд" хайад райсдзӕн хореографийы ӕппӕтуӕрӕсейон фестиваль-конкурс "Терпсихора России"-йы, ам ансамбль равдисдзӕн дыууӕ ирон кафты, фехъусын кодта Sputnik Цхинвалы районы культурӕйы хайады хистӕр Гаглойты Ростик.
Адӕмон кафты ансамбль "Амонд" архайы Цхинвалы районы культурӕйы хайады дӕлбар. Ансамбль кӕны фестивалмӕ 12 къайы. Равдисдзысты дыууӕ кафты — "Симд" ӕмӕ "Хӕххон кафт".
"20 ноябры нӕ кафджытӕ хайад райсдзысты конкурсон программӕйы, стӕй та фӕнд кӕнынц гала-концерты дӕр сӕ арӕхстдзинад равдисын", — загъта Гаглойты Ростик.
Уый ма банысан кодта, ацы фестивалы ансамбль арӕх кӕй бацахсы призон бынӕттӕ, 2013 азы та "Амонд" райста конкурсы адӕмон кафты номинацийы фыццаг бынат.
Фестиваль-конкурс "Терпсихора России" цӕудзӕн 20 ноябры Ессентукийы. Хореографион къордтӕ архайдзысты кафты цыппар номинацийы — адӕмон, классикон, эстрадон ӕмӕ нырыккон.
