ЦХИНВАЛ, 17 ноя — Sputnik. Цæгатирыстойнаг энергетиктæ аиуварс кодтой электрохызæджы аварийы фæстиуджытæ Нузал ӕмӕ Дæллаг Зæрæмæджы хъæуты, фехъусын кодта Sputnik "Энергоресурсы" директор Гæбæраты Алан.
Электронон ифтонгад æппæт Хуссар Ирыстоны территорийыл ахицæн къуырисæры, 22:00 сахатмæ æввахс. Рухсы ахицæны аххосæг ссис электронон хаххы авари.
"Нӕ цӕгаттаг коллегӕтӕ аиуварс кодтой аварийы фӕстиуджытӕ ӕмӕ республикӕйы сног ис рухсӕй ифтонгад", — загъта Гӕбӕраты Алан.
Йӕ ныхӕстӕм гӕсгӕ, электронон хаххыл авари ӕрцыд Нузалы хъæуæй Дæллаг Зæрæмæджы онг фадыджы. Цалдӕр сахаты фӕстӕ баиу кодтой резервон хахх, фӕлӕ цыбыр ӕмгъуыдмӕ уый дӕр фехӕлд ӕмӕ та райсомырдæм рухс ахицæн.
"Резервон хахх нӕма бантыст сцалцӕг кӕнын, стыр мит дзы кӕй ныууарыд, уый тыххӕй", — загъта "Энергоресурсы" директор.
Сарæхгонд авариты фæстиуæгæн рухс хицæн кæнын кæй райдыдта, уымӕ гӕсгӕ президент Тыбылты Леонид аскъуыддзаг кодта Хуссар Ирыстоны территорийыл чысыл гидроэлектростанцтæ саразын ӕмӕ бафыста ӕмбӕлон барамындтӕ.
