ЦХИНВАЛ, 18 ноя — Sputnik. Дзауы районы Цъамад ӕмӕ Шихантуры быдыртыл цы картофы тыллӕг ӕркодтой, уый районы администраци уары ахуырадон уагдӕттыл, интернаттыл ӕмӕ зӕрӕдты хӕдзарыл, фехъусын кодтой Sputnik администрацийы пресс-службӕйы.
Ацы аз Дзауы районы администрацийы хъӕппӕрисӕй эксперименталон хуызы байтыдтой Цъамад ӕмӕ Шихантуры быдыртыл картоф. Фӕлварӕн разынд ӕнтыстджын ӕмӕ ӕрбалӕугӕ азы районы ныссадздзысты ноджы фылдӕр картоф быдырты.
"Фӕйнӕ 150 килограммы дӕттынц районы ӕппӕт скъолатӕ ӕмӕ сабидонӕн", — радзырдта районы пресс-службӕйы кусӕг Тедеты Лиана.
Уымӕй дарддӕр ма, йӕ ныхӕстӕм гӕсгӕ, Цхинвалы скъола-интернат ӕмӕ Зӕрӕдты хӕдзар дӕр райстой лӕвары хуызы картоф.
